الماتىلىق دارىگەرلەر كوروناۆيرۋستىڭ بالالاردىڭ دەنساۋلىعىنا قالاي اسەر ەتەتىنىن ايتىپ بەردى
بۇل تۋرالى قالالىق كلينيكالىق بالالاردىڭ ينفەكسيالىق اۋرۋحاناسىنىڭ باس دارىگەرى ەرجان سەرالين ايتتى، دەپ حابارلايدى قازاقپارات ءتىلشىسى.
ەرجان سەراليننىڭ ايتۋىنشا، بالالار كوروناۆيرۋسپەن ءجيى اۋىرادى، ءبىراق ولاردا اۋرۋعا ەرەسەكتەردەگىدەي يممۋندىق جاۋاپ جوق، ادەتتە اۋرۋدىڭ اعىمى كىشكەنتايلاردا جەڭىل وتەدى. «بۇل بالالارعا ساق بولۋ قاجەت ەمەس دەگەندى بىلدىرمەيدى. ويتكەنى بالالار السىرەگەن يممۋنيتەتپەن دەرتتى جۇقتىرسا، سونداي-اق ولاردىڭ سوزىلمالى اۋرۋلارى بولسا، كوروناۆيرۋستىڭ قاۋپى بولادى»، - دەدى باس دارىگەر.
ونىڭ ۇستىنە، بالالار - كوروناۆيرۋستىڭ امبەباپ تاسىمالداۋشىلارى، سوندىقتان ەرەسەكتەر جاۋاپتى بولۋى كەرەك، ۆاكسينالانعان بولسا دا، قوعامدىق ورىنداردا بەتپەردە مەن الەۋمەتتىك قاشىقتىقتى ساقتاعان ءجون. دارىگەر ينفەكسياعا ءبىر جاسقا دەيىنگى بالالاردىڭ دا بەيىم ەكەنىن ايتتى.
«جاس شەكتەۋى جوق، كوبىنەسە بۇل موبيلدى جاستاعى بالالار. كلينيكالىق كورىنىسكە كەلەتىن بولساق، ەگەر وتكەن جىلى كاتارالدى بەلگىلەر باسىم بولسا، بيىل كاتارالدى سيندروممەن قاتار اسقازان- ىشەك جولدارىنىڭ بۇزىلۋ جيىلىگى، سونداي-اق لەتارگيا، تابەت پەن تەمپەراتۋرانىڭ تومەندەۋى سياقتى جالپى ينتوكسيكاتسيا بەلگىلەرى بايقالادى. ءبىزدىڭ اۋرۋحاناعا اۋرۋى ورتاشا دەڭگەيدەگى بالالار ءجيى تۇسەدى. دەرتى اسقىنعان بالالار دا بولادى. ارينە، دەرتتىڭ اۋىرلىعى بالانىڭ باستاپقى جاعدايىنا، انامنەزدە بۇرىننان بار اۋرۋلاردىڭ قاتار جۇرۋىنە دە بايلانىستى ەكەنىن اتاپ وتكەن ءجون»، - دەدى ول.
قالالىق كلينيكالىق بالالاردىڭ ينفەكسيالىق اۋرۋحاناسىنىڭ باس دارىگەرىنىڭ ايتۋىنشا، بالالار دەرتتى ۇيدەگى ەرەسەكتەرمەن بايلانىس كەزىندە جۇقتىرادى.
«بالالار اراسىنداعى دەرت جۇقتىرۋ ەرەسەكتەرمەن تىكەلەي بايلانىستى. ۇلكەندەر اراسىندا ۆيرۋس جۇقتىرۋ تومەندەسە، وندا بالالار اراسىندا اۋرۋدىڭ تاراۋى ازايادى. ال دەرتتىڭ الدىن الاتىن جالعىز ءتيىمدى جول، جالپىعا ورتاق ۆاكسينا سالدىرۋ. سوندا عانا ءبىز ءوزىمىزدى دە، بالالارىمىزدى دا ءقاۋىپتى دەرتتەن قورعاي الامىز»، - دەدى ەرجان سەرالين.
بالالارداعى كوروناۆيرۋستىڭ اسقىنۋى پنەۆمونيانىڭ ورشۋىنەن بولادى، ءجيى ەمەس، ءبىراق قاۋىپتى پوستكوۆيدتى قابىنۋ سيندرومى كوپتەگەن ورگاندار مەن جۇيەلەردى زاقىمدايدى.
«ءبىزدىڭ كلينيكادا جۇقپالى اۋرۋلاردىڭ جەتەكشى ماماندارى مەن رەانيماتولوگتار، مامانداندىرىلعان نەۆروپاتولوگتار، كارديولوگتار، پۋلمونولوگتار، ەندوكرينولوگتار، نەفرولوگتار، حيرۋرگتار تاۋلىك بويى بايلانىستا بولاتىن مۋلتيديستسيپلينارلى توپ قۇرىلدى. ءاربىر كۇردەلى كلينيكالىق جاعداي تالقىلاۋعا شىعارىلادى. قاجەت بولعان جاعدايدا سوزىلمالى اۋرۋلارعا قارسى تەراپيالىق كوررەكسيا جۇرگىزىلەدى. ءبىز ءار بالاعا وتە مۇقيات قارايمىز، بارلىق قاجەت ساراپتامالار مەن قوسىمشا تەكسەرۋلەردى ۇلكەن جاۋاپكەرشىلىكپەن جۇرگىزەمىز»، - دەدى سپيكەر.
دارىگەر ادامدار كوپ جينالاتىن جەرلەردە، قوعامدىق كولىكتە، كافەلەر مەن ساۋدا ورتالىقتارىندا ينفەكسيا قاۋپى ءالى دە جوعارى ەكەنىن ەسكە سالدى. سوندىقتان بۇرىنعىداي الدىن الۋ شارالارىن ساقتاپ، بالالارعا وسىنى ۇيرەتۋ قاجەت.
«جاقىندا، كوروناۆيرۋستان باسقا، ماۋسىمدىق ج ر ۆ ي جانە تۇماۋ اۋرۋلارى بەلەڭ الاتىن بولادى. كوروناۆيرۋستان ايىرماشىلىعى، بۇل ينفەكسيالار بالالاردا ەرەسەكتەرگە قاراعاندا اۋىر بولۋى مۇمكىن. سوندىقتان، بۇگىندە بالالاردىڭ قوعامدىق ورىندارعا بارۋىن شەكتەۋگە تىرىسۋ كەرەك جانە قاجەت بولعان جاعدايدا عانا ولارمەن بىرگە بولىپ، قوعامدىق كولىكتە قاشىقتىقتى ساقتاۋ جانە مەديتسينالىق ماسكانى دۇرىس تاعۋ كەرەك»، - دەپ تۇيىندەدى دارىگەر.
اۆتور: الما مۇقانوۆا
