قوعام «حالىق ۇنىنە قۇلاق اساتىن مەملەكەت» قاعيداتىنا سەنىم ارتىپ كەلەدى - ساراپشى

نۇر-سۇلتان. قازاقپارات - ەۋروپالىق قۇقىق جانە ادام قۇقىقتارى ساراپتامالىق ينستيتۋتىنىڭ ديرەكتورى، ۇلتتىق قوعامدىق سەنىم كەڭەسىنىڭ مۇشەسى مارات ءباشىموۆ پرەزيدەنتتىڭ جاڭا جولداۋى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«بىرىنشىدەن، پرەزيدەنت قاسىم-جومارت توقايەۆتىڭ باعىتىنا سەنىم ارتا ءتۇستى. ول بۇكىل قوعام مەن حالىق ءۇشىن ادىلەتتى قوعام مەن ءتيىمدى مەملەكەت قۇرۋ قاجەتتىگىن اشىق ايتىپ وتىر. مۇندا ادىلەتتىڭ نە ەكەنى قاتارداعى ادامعا دا تۇسىنىكتى. وسى ەكى تەزيستىڭ استىندا كوپ ماعىنا جاتىر. مەملەكەتتىڭ ءتيىمدى بولۋى - مەملەكەتتىك باسقارۋدى جەتىلدىرۋ، سىبايلاس جەمقورلىققا قارسى كۇرەس جانە ت. ب. قامتيدى. وعان سەنىم ارتا ءتۇستى، كوپ تالقىلانا باستادى، الەۋمەتتىك جەلىلەردە دە كوپ تالقىلانىپ جاتىر»، - دەدى م. ءباشىموۆ «قازاقپارات» حالىقارالىق اقپارات اگەنتتىگىنىڭ باسپا ءسوز ورتالىعىندا وتكەن ساراپتامالىق تالقىلاۋدا.

سونداي-اق، ينستيتۋت ديرەكتورى قۇقىقتىق سالانى دامىتۋعا قاتىستى دا پىكىر ءبىلدىردى.

«قۇقىقتىق سالادا دا قوعامدىق سانا وزگەرىپ كەلەدى. بۇل وتە ماڭىزدى. پروكۋراتۋرادا دا سولاي. نەنى دامىتۋ كەرەك؟ پروكۋراتۋرا قىزمەتىندەگى اشىقتىق، ايقىندىقتى دامىتقان ءجون. وسى باعىتتارعا سىن ايتىلىپ جاتىر»، - دەدى مارات ءباشىموۆ.

سونىمەن بىرگە، مارات ءباشىموۆ «حالىق ۇنىنە قۇلاق اساتىن مەملەكەت» قاعيداتىنا قوعامنىڭ سەنە باستاعانىن اتاپ ءوتتى.

ايتا كەتەيىك، «قازاقپارات ح ا ا» اق باسپا ءسوز ورتالىعىندا ق ر پرەزيدەنتى جولداۋىنىڭ نەگىزگى باعىتتارى تۋرالى ساراپتامالىق تالقىلاۋ ءوتتى. جيىنعا ق ر پارلامەنتى ءماجىلىسىنىڭ دەپۋتاتى ايدوس سارىم، ەۋروپالىق قۇقىق جانە ادام قۇقىقتارى ساراپتامالىق ينستيتۋتىنىڭ ديرەكتورى مارات ءباشىموۆ، ق ر پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى يۋليا كۋچينسكايا قاتىستى.