جەڭىل كولىكپەن سوقتىعىسقان بروندى تاسىمالداۋشى تەحنيكا قارۋلى كۇشتەرگە تيەسىلى ەمەس - قورعانىس مينيسترلىگى
ۆەدومستۆونىڭ باسپا ءسوز قىزمەتى وسىنداي حابار تاراتتى، دەپ حابارلايدى قازاقپارات ءتىلشىسى.
بۇعان دەيىن نۇر-سۇلتان قالاسىنىڭ پوليتسيا دەپارتامەنتى بەرگەن تۇسىنىكتەمە بويىنشا، وقيعا 1- قىركۇيەكتە بولعان.
ساعات 07.35 تە «Nissan Almera» ماركالى اۆتوكولىگىن تىزگىندەگەن 46 جاستاعى جۇرگىزۋشى «نۇر-سۇلتان-قاراعاندى» تاسجولىمەن ارمانداستار كوشەسىنىڭ قيىلىسىندا سولعا بۇرىلعان كەزدە دابىل شامدارى ىسكە قوسىلعان جانە ارنايى دىبىس سيگنالى بار پاترۋلدىك اۆتوكولىككە ىلەسىپ كەلە جاتقان «ب ت ر 82-ا» كولىگىنە جول بەرمەي، سالدارىنان ەكەۋى سوقتىعىسقان.
«جول-كولىك وقيعاسى سالدارىنان زارداپ شەككەندەر جوق.
«Nissan Almera» اۆتوكولىگىنىڭ جۇرگىزۋشىسىنە قاتىستى اكىمشىلىك قۇقىق بۇزۋ تۋرالى كودەكستىڭ 610-بابىنىڭ 1-بولىگى بويىنشا اكىمشىلىك ءىس قوزعالدى.
ماتەريال نۇر-سۇلتان قالاسىنداعى مامانداندىرىلعان اۋدانارالىق سوتىنا جولداندى.
پوليتسيا دەپارتامەنتى دابىل شامدارى ىسكە قوسىلعان جانە ارنايى دىبىستىق سيگنالى بار كولىك قۇرالدارى جاقىنداعان كەزدە وزگە كولىكتەر جول بەرۋ كەرەكتىگىن ەسكەرتەدى»، - دەپ جازادى دەپارتامەنتتىڭ باسپا ءسوز قىزمەتى.
ازىرگە اپاتقا تۇسكەن بروندى تاسىمالداۋشى تەحنيكانىڭ قاي ۆەدومستۆوعا تيەسىلى ەكەنى بەلگىسىز.
قورعانىس مينيسترلىگى ونىڭ قارۋلى كۇشتەردىڭ بازاسىندا تىركەلمەگەنىن ءمالىم ەتتى.
«نۇر-سۇلتان قالاسىندا «Nissan Almera» اۆتوكولىگى مەن ب ت ر- دىڭ سوقتىعىسۋىنا قاتىستى ب ا ق- قا جانە الەۋمەتتىك جەلىگە تارالعان اقپاراتقا بايلانىستى قورعانىس مينيسترلىگى جول-كولىك وقيعاسىنا تۇسكەن بروندى ترانسپورتەردىڭ قارۋلى كۇشتەرگە تيەسىلى ەمەستىگىن حابارلايدى»، - دەلىنگەن مينيسترلتىكتىڭ مالىمەتىندە.
