سەرىك نەگيموۆ: پرەزيدەنت جولداۋى - مەملەكەتتىڭ ستراتەگيالىق دامۋىنىڭ ايناسى
مۇنداي پىكىردى قازاقستاننىڭ ەڭبەك سىڭىرگەن قايراتكەرى، ل. گۋميليەۆ اتىنداعى ە ۇ ۋ پروفەسسورى، فيلولوگيا عىلىمدارىنىڭ دوكتورى سەرىك نەگيموۆ ءبىلدىردى، دەپ حابارلايدى قازاقپارات ءتىلشىسى.
«ەل پرەزيدەنتى قاسىم-جومارت توقايەۆتىڭ بيىلعى جولداۋىندا مەملەكەتىمىزدىڭ دامۋ ستراتەگياسى ناقتى ايقىندالعان. «ەگەمەندىك دەگەنىمىز - جالاڭ ۇران مەن جالىندى ءسوز ەمەس. ءبىز ءۇشىن ەڭ ماڭىزدىسى - ءار ازاماتتىڭ تاۋەلسىزدىك يگىلىگىن سەزىنە الۋى. ونىڭ باستى كورىنىسى - ەلدەگى بەيبىت ءومىر، قوعامداعى تۇراقتىلىق پەن تىنىشتىق. سونداي-اق، حالىقتىڭ تۇرمىس ساپاسىنىڭ جاقسارۋى جانە جاستاردىڭ بولاشاققا نىق سەنىممەن قاراۋى. بارلىق باستامامىز وسىعان باعىتتالۋدا»، دەپ اتاپ ءوتتى مەملەكەت باسشىسى.
جولداۋدىڭ وزەكتى يدەياسىن وسى جولداردان بايقاۋعا بولادى. بۇل شىن مانىسىندە پاتريوتتىق ويدى اشىق كورسەتىپ وتىر. پرەزيدەنت جولداۋىندا مەملەكەتىمىزدىڭ ەكونوميكاسى، ەكولوگياسى، عىلىمى، ءبىلىم بەرۋ جۇيەسى، جەر قويناۋى، سونداي-اق اۋىل شارۋاشىلىعىنىڭ الەۋەتى، ازىق-تۇلىك باعاسى، اۋىز سۋ ماسەلەلەرىن ناقتى اتاپ كورسەتتى»، - دەدى عالىم.
وسى ورايدا سەرىك نەگيموۆ جولداۋدا اۋىل شارۋاشىلىعى سالاسىن دامىتۋعا قاتىستى ماڭىزدى تاپسىرمالار بەرىلگەنىن جەتكىزدى.
«مەملەكەت باسشىسى بيىل اۋىل شارۋاشىلىعى جەرلەرىن شەتەلدىكتەرگە جانە ولاردىڭ قاتىسى بار كومپانيالارعا ساتۋعا جانە جالعا بەرۋگە ءبىرجولا تىيىم سالعان زاڭعا قول قويعانىن بىلەمىز. اۋىل شارۋاشىلىعى جەرلەرىن حالىقتىڭ يگىلىگى ءۇشىن پايدالانۋدا ماڭىزدى قادامدار جاسالىپ وتىر. سونىمەن قاتار، پرەزيدەنت دەنساۋلىق، بيولوگيالىق قاۋىپسىزدىك جونىندە جاقسى ويلارىن كوپشىلىككە جەتكىزدى. اتاپ ايتقاندا، قورعانىس ونەركاسىبى كەشەنىن جانە اسكەري دوكترينامىزدى تولىعىمەن قايتا قاراۋ باعىتتارى وسى جولداۋدىڭ جاقسى ءبىر سيپاتى بولىپ تۇر. ويتكەنى، قورعانىس قابىلەتىمىزدى نىعايتۋعا ايرىقشا ءمان بەرۋ نازاردان تىس قالماعانى ابزال»، - دەدى فيلولوگيا عىلىمدارىنىڭ دوكتورى.
«پرەزيدەنت ءبىلىم بەرۋ سالاسىنا توقتالا كەلە، ەلىمىزدەگى مەكتەپتەر سانىن ارتتىرۋعا ەرەكشە ەكپىن قويدى. وسى ورايدا الداعى جىلدارى سالىناتىن مەكتەپ سانىن ءبىر مىڭعا جەتكىزۋدى مىندەتتەدى. جولداۋدا ەلىمىزدىڭ عىلىمي- ينتەللەكتۋالدىق مادەنيەتىن جوعارى كوتەرۋگە، عىلىمدى دامىتۋعا بايلانىستى سالماقتى ويلار ايتىلدى. اتا زاڭىمىزدا قازاقستاننىڭ مەملەكەتتىك ءتىلى قازاق ءتىلى ەكەنى ناقتى كورسەتىلگەن. مەملەكەت باسشىسى وسىعان قاتىستى ناقتى شەگەلەپ ايتتى. قازاق ءتىلى عىلىم تىلىنە جيىرماسىنشا عاسىردىڭ باسىندا اينالعان بولاتىن. وعان دالەل رەتىندە الاش قايراتكەرلەرىنىڭ ەڭبەگىن اتاپ وتۋگە بولادى. سول كەزدە قازاق تىلىندەگى عىلىمي ءتىل كەرەمەت دامىعان ەدى. الايدا كەڭەستىك كەزەڭدە وسىنىڭ بارىنە تىيىم سالىندى. سوندىقتان تاۋەلسىزدىك كەزەڭىندە قازاق تىلىندەگى عىلىمي باعدار تىڭ سەرپىن الدى. وسى ورايدا جولداۋدا پرەزيدەنت ءوزىنىڭ ءادىل پىكىرىن ايتتى»، - دەدى سەرىك نەگيموۆ.
مۇنىمەن قوسا عالىم مەملەكەت باسشىسى حالقىمىز ءۇشىن زيالى قاۋىمنىڭ ماڭىزى جايىندا ەرەكشە پىكىر بىلدىرگەنىن ايتتى.
«زيالى قاۋىم ۇلت تاعدىرىنا قاتتى اسەر ەتەدى. ۇلت زيالىلارىنىڭ ۇستانىمدارى مەملەكەتىمىزدىڭ رۋحاني دامۋىندا زور ۇلەس قوساتىن قۇبىلىستار. ەل پرەزيدەنتىنىڭ قازاقستان حالقىنا بۇل جولداۋى - مەملەكەتتىڭ ستراتەگيالىق دامۋىنىڭ ايناسى»، - دەدى پروفەسسور.
