قارۋلى كۇشتەردە اسكەرلەردى قاۋىرت تەكسەرۋ باستالدى
ەل پرەزيدەنتى قاسىم- جومارت توقايەۆتىڭ 2021 -جىلعى 1- قىركۇيەكتەگى قازاقستان حالقىنا جولداۋىندا، سونداي- اق 2020 -جىلعى قاراشادا قورعانىس مينيسترلىگىنىڭ القاسىندا بەلگىلەنگەن تاپسىرمالارىن ىسكە اسىرۋ اياسىندا ءبىرقاتار وڭىرلىك قولباسشىلىقتاردىڭ اسكەري بولىمدەرى، دەسانتتىق- شابۋىلداۋ اسكەرلەرى، اسكەري- تەڭىز كۇشتەرى، اسكەري- اۋە كۇشتەرى جاۋىنگەرلىك ازىرلىكتى تەكسەرۋ ماقساتىندا دابىل بويىنشا كوتەرىلدى.
اسكەرلەردى ەلدىڭ وزگە ايماقتارىنا جىبەرۋگە بۇيرىق بەرىلدى. اسكەري قىزمەتشىلەر اسكەري تەحنيكامەن بىرگە تەمىرجول ەشەلوندارىمەن، اسكەري- كولىك اۆياتسياسىمەن الىس جەرلەرگە جىبەرىلەدى.
بۇدان باسقا، وقۋ- جاتتىعۋ ماقساتىندا جەكە قۇرامدى تاسىمالداۋعا ازاماتتىق اۆياكومپانيالاردىڭ ۇشاقتارىن تارتۋ جوسپارلانعان. كەيبىر زاپاستاعى اسكەري مىندەتتىلەردى شاقىرۋدى جۇزەگە اسىرۋ ءۇشىن جەرگىلىكتى اسكەري باسقارۋ ورگاندارىنا نۇسقاۋ بەرىلدى. بىرنەشە ازاماتقا اسكەرگە شاقىرۋ قاعازدارى تابىس ەتىلدى. ونىڭ نەگىزىندە اسكەري بولىمدەردى جاساقتاۋ ءۇشىن ولار جيناۋ پۋنكتتەرىنە كەلۋى ءتيىس بولدى. وسىلايشا اسكەري- وقىتىلعان رەزەرۆتى جۇمىلدىرۋ مۇمكىندىكتەرى تەكسەرىلەدى.
بەلگىلەنگەن اۋداندارعا كەلگەننەن كەيىن اسكەرلەر جاۋىنگەرلىك وقۋ- جاتتىعۋ تاپسىرمالارىن ورىندايدى. اتالعان تاپسىرمالاردىڭ مازمۇنى ولارعا قوسىمشا جەتكىزىلەدى.
