ەلوردا مەكتەپتەرىنىڭ بىرىندە ءورت شىقتى

نۇر-سۇلتان. قازاقپارات - ەلورداعى №54-مەكتەپتە ءورت تۇتانىپ، وقۋشىلار قاۋىپسىز جەرگە شىعارىلدى، دەپ حابارلايدى قازاقپارات ءتىلشىسى.

بۇل تۋرالى نۇر-سۇلتان قالاسى توتەنشە جاعدايلار دەپارتامەنتىنەن ءمالىم ەتتى.

«بۇگىن ساعات 09.10-دا «102» ارناسىنا يمانبايەۆ كوشەسىندەگى №54-ورتا مەكتەپتە ءورت شىعىپ جاتقانى تۋرالى قوڭىراۋ ءتۇستى. پوليتسيانىڭ كۇشىمەن وقۋشىلار مەن مۇعالىمدەر قاۋىپسىز جەرگە كوشىرىلىپ، جاقىن ماڭداعى كوشەلەر قورشاۋعا الىندى. وقيعادان زارداپ شەككەندەر جوق»، - دەلىنگەن حابارلامادا.

وقيعا ورنىنا ارنايى تەحنيكا جۇمىلدىرىلعان. جالىن 8 شارشى مەتر اۋماقتى شارپىعان. «ءورت تولىقتاي ءسوندىرىلدى. الدىن الا مالىمەتتەر بويىنشا، وعان ەلەكتر سىمدارىنىڭ تۇيىقتالۋى سەبەپ بولۋى ىقتيمال. اتالعان فاكتى بويىنشا تەكسەرۋ جۇرگىزىلۋدە»، - دەدى دەپارتامەنت.