بەرىك توقتاروۆ: پرەزيدەنت جولداۋىندا سىرتتان تونەتىن قاۋىپكە دايىن بولۋعا شاقىردى

وسكەمەن. قازاقپارات - ق ر ۇلتتىق ۇلانى «شىعىس» وڭىرلىك قولباسشىلىعى قولباسشىسىنىڭ تاربيە جونىندەگى ورىنباسارى بەرىك توقتاروۆ پرەزيدەنت قاسىم-جومارت توقايەۆتىڭ «حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى حالىققا جولداۋىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«مەملەكەت باسشىسى، جوعارى باس قولباسشىمىز حالىققا ارنالعان كەزەكتى جولداۋىن قازىرگى كۇردەلى كەزەڭدى ەڭسەرۋدىڭ جاڭا باعىتتارىنا ارنادى. الەمدە بەلەڭ العان ەپيدەميالىق احۋال ەلىمىزدىڭ بارلىق سالاسىنا كەرى اسەرىن تيگىزبەي قويعان جوق. پرەزيدەنت مەملەكەتتەگى ساياسي، الەۋمەتتىك-ەكونوميكالىق تۇراقتىلىق پەن جۇمىس ورىندارىن اشۋ جانە حالىقتىڭ تابىسىن ارتتىرۋ ءۇشىن 5 نەگىزگى باستاما كوتەردى. الداعى 2022 -جىلدىڭ 1 قاڭتارىنان باستاپ ەلىمىزدەگى ەڭ تومەنگى جالاقى مولشەرى 42500 تەڭگەدەن 60 مىڭ تەڭگەگە دەيىن كوبەيەتىن بولدى. بۇل 1 ميلليون قازاقستاندىققا تىكەلەي، ال ەڭبەك ەتىپ جۇرگەن بارلىق ازاماتتارعا جاناما تۇردە اسەر ەتەدى»، - دەدى بەرىك توقتاروۆ.

ونىڭ ايتۋىنشا، بۇل الەۋمەتتىك قولداۋ ۇلاندىقتاردى دا سىرت اينالىپ كەتكەن جوق. ماسەلەن، 2021-2023-جىلدارى وفيتسەرلەردىڭ جالاقىسى 70 پايىزعا، كەلىسىمشارت بويىنشا قىزمەت ەتەتىن اسكەريلەردىڭ ەڭبەكاقىسى 60 پايىزعا جۋىق ارتادى.

«قازىردىڭ وزىندە ۇلاندىقتاردىڭ ايلىق جالاقىسى بىرتىندەپ ءوسىپ كەلەدى. سونىمەن قاتار ەلىمىزدەگى 13,5 مىڭنان استام اسكەري قىزمەتشىگە تۇرعىن ءۇي تولەمدەرى بەرىلىپ تۇرادى. 2024-جىلدىڭ سوڭىنا دەيىن ارنايى جاساق قۇرامىنداعى كەلىسىمشارت بويىنشا قىزمەت اتقاراتىن بارلىق اسكەريگە وفيتسەر شەنىن بەرۋ جوسپارلانعان. ياعني، بۇل وفيتسەرلىك شەنگە بايلانىستى جالاقى مولشەرى دە وسەدى دەگەن ءسوز. بۇل ءبىز ءۇشىن ماڭىزدى الەۋمەتتىك قولداۋ بولماق»، - دەدى پولكوۆنيك.

ءوز سوزىندە ول مەملەكەت باسشىسىنىڭ سىرتقى قورعانىستى كۇشەيتۋگە ەرەكشە توقتالعانىن ايتتى.

«قاسىم-جومارت كەمەل ۇلى اسكەري دوكترينامىزدى تولىقتاي قايتا قاراستىرۋعا مىندەتتى ەكەندىگىمىزدى جەتكىزدى. مەنىڭشە، بۇل دەر كەزىندە كوتەرىلگەن ماسەلە. سەبەبى، اۋعانستاندا ۇلكەن شيەلەنىس بولىپ جاتقانى بەلگىلى. ول ەلمەن ورتاق شەكارامىز بولماعانىمەن، كورشىلەس ەلدەردەگى تۇراقسىزدىقتىڭ سالقىنى بىزگە دە تيەرى انىق. سوندىقتان پرەزيدەنتىمىز ءوز جولداۋىندا سىرتتان تونەتىن قاۋىپتى مودەلدەۋ ايرىقشا وزەكتى ەكەنىن ايتىپ، سەناريلەر دايىنداعان ءجون ەكەنىن ايتتى. ياعني، بۇل ەلىمىزدىڭ قارۋلى كۇشتەرىن سىرتتان كەلەتىن قاۋىپ-قاتەرگە دايىن بولۋعا مىندەتتەيدى. ءوز كەزەگىندە ۇلتتىق ۇلاننىڭ وڭىرلىك قولباسشىلىقتارى مەن اسكەري بولىمدەرىندە جاۋىنگەرلىك، شتابتىق جاتتىعۋلار كەشەندى تۇردە وتكىزىلىپ تۇرادى»، - دەدى بەرىك توقتاروۆ.