قازاقستاندا بۇقارالىق سپورتتى دامىتۋدىڭ جاڭا ستراتەگياسى ازىرلەنەدى

نۇر- سۇلتان. قازاقپارات - «قازاقپارات» ديرەكتورلار كەڭەسىنىڭ مۇشەسى، م س م جوبالىق كەڭسەسىنىڭ احۋالدىق- تالداۋ ورتالىعىنىڭ جەتەكشىسى قامبار وماروۆ «قازاقستان سپورتىن ترانسفورماتسيالاۋ» جوبالىق كەڭسەسى جۇمىسىنىڭ جەتى نەگىزگى باعىتىن اتادى، دەپ حابارلايدى قازاقپارات ءتىلشىسى.

ايتا كەتەيىك، جاقىندا ەلىمىزدە «قازاقستان سپورتىن ترانسفورماتسيالاۋ» جوبالىق كەڭسەسى قۇرىلدى. جوبالىق كەڭسەنى باسقارۋعا قامبار وماروۆ تاعايىندالدى. «ترانسفورماتسيا بويىنشا جوبالىق كەڭسە سپورتتاعى تۇرلەنۋدىڭ تولىق سيكلىن جۇرگىزەدى، ياعني مەملەكەتتىك دەڭگەيدە باسقارۋ جۇيەسىنەن اۋىلدىق وكرۋگتەرگە دەيىن. سونىمەن قاتار كەڭسە ۇلتتىق وليمپيادالىق كوميتەتىمەن، ۇلتتىق پاراليمپيادا كوميتەتىمەن، فەدەراتسيالارمەن ءوزارا ءىس- قيمىلدا بولادى، سونداي- اق جاپپاي بالالار سپورتى مەن جوعارى جەتىستىك سپورتىن دامىتۋ سالاسىندا ەل ءۇشىن ستراتەگيالىق ماقساتتاردى ازىرلەيدى»، - دەدى قامبار وماروۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، جوبالىق كەڭسە ءوز جۇمىسىن سالاداعى تىڭعىلىقتى SWOT- تالداۋدان باستايدى جانە ستراتەگيالىق باعىتتاردىڭ نەگىزگى ءتىزىمىن قۇرادى. مۇنىمەن قوسا، جوبالار توپتاماسى قۇرىلىپ، باسقارۋ جۇيەسىن جەتىلدىرۋمەن اينالىسىدا، سونداي- اق مادەنيەت جانە سپورت مينيسترلىگىمەن بىرلەسە بۇقارالىق سپورتتى دامىتۋدىڭ جاڭا ستراتەگياسىن دايارلاۋعا قاتىسادى. ترانسفورماتسيا بويىنشا توپتىڭ باستاپقى تالداۋدىڭ نەگىزىندە كوماندا جەتى ستراتەگيالىق باعىتتى بەلگىلەگەنىنە توقتالعان ق. وماروۆ، ەندى وسى باعىتتار بويىنشا جۇمىس ىستەۋ كەرەك ەكەنىن اتاپ ءوتتى.

«بىرىنشىدەن، بالالار سپورتىن دامىتۋ ەسكەرىلگەن. ەكىنشىسى - باسقارۋ جۇيەسىنىڭ ترانسفورماتسياسى، ءۇشىنشىسى - كادرلىق ساياساتتى جەتىلدىرۋ، ءتورتىنشىسى - زاڭنامالىق ءارى رەتتەۋ باستامالارى، بەسىنشىسى - مەديتسينالىق- بيولوگيالىق جانە فارماتسيەۆتيكالىق قامتاماسىز ەتۋ، التىنشىسى - سپورت ينفراقۇرىلىمىن دامىتۋ، جەتىنشىسى - حالىقارالىق ىنتىماقتاستىق. ستراتەگيالىق باعىتتاردىڭ ءارقايسىسى بويىنشا توپتار جول كارتاسىن ازىرلەيدى»، - دەدى ول.