بالا تۋۋدان رەكورد ورناتساق، وعان بالاباقشا مەن مەكتەپ دايىن با - ايدوس سارىم

نۇر- سۇلتان. قازاقپارات - ق ر پارلامەنت ءماجىلىسىنىڭ دەپۋتاتى ايدوس سارىم مەملەكەت باسشىسىنىڭ جاڭا جولداۋىنا قاتىستى پىكىرىمەن ءبولىستى، دەپ حابارلايدى قازاقپارات ءتىلشىسى.

«پاندەميا كەزىندە «بەبي- بۋمنىڭ» جاڭا رەكوردىن ورناتتىق دەپ جاتىرمىز. وعان بالاباقشا مەن مەكتەپ دايىن با؟ بىلتىر 425 مىڭ بالا دۇنيەگە كەلىپتى. وعان بيىلدىڭ جارتى جىلىن قوسىپ 1 ميلليون نارەستە دەپ الساق. ول 1 ميلليون بالاعا 2 جىلدان سوڭ، بالاباقشا كەرەك، 6 جىلدان سوڭ مەكتەپ كەرەك.

وسىنى ەسكەرگەن پرەزيدەنت 1000 مەكتەپ ماسەلەسىن بۇگىننەن كوتەرىپ وتىر. شارۋا مەكتەپ سالۋمەن بىتپەيدى، وعان كادر كەرەك، ونى دايىنداۋ بولەك اڭگىمە. ەلوردانىڭ وزىندە 1 مىڭعا جۋىق پەداگوگ تاپشى ەكەن. كوزدى اشىپ- جۇمعانشا ول بالالارعا جوعارى ءبىلىم الۋ كەرەك بولادى، ودان ءارى ولار ەلىمىزدىڭ ەڭبەك نارىعىنا قاتىسادى. وسى تۇرعىدا مەملەكەت 1 ميلليون بالانى ءبىلىم جانە جۇمىسپەن قامتۋعا دايىن با دەگەن سۇراق تۋىندايدى» - دەدى ايدوس سارىم ق ر سىبايلاس جەمقورلىققا قارسى ءىس- قيمىل اگەنتتىگىندە وتكەن «Antikor Live» جوباسىنىڭ ەفيرىندە.

ونىڭ ايتۋىنشا، ەلىمىزدە الەمدىك دارەجەدە ءبىلىم بەرەتىن وقۋ وردالارى از.

«سوندىقتان جولداۋداعى تاپسىرمادان بولەك، قوعام ءبىلىم بەرۋ ماسەلەسىمەن شىنايى اينالىسۋى قاجەت. جولداۋداعى ماعان تاعى ءبىر ۇناعان ءسات، ۇلكەن، مەگا جوبالاردان باس تارتۋىمىز. قاراپ وتساڭىز، جولداۋدىڭ ىشىندە ۇزدىك 30-قا، 10-قا كىرەمىز، الەمدى باسقارامىز، قۇتقارامىز دەگەن اڭگىمە جوق. ءبىزدىڭ مىندەت 19 ميلليون حالقىمىزدىڭ قامى، سونىڭ بولاشاعى مەن باي- قۋاتى. جانە ءبىر ايتىپ وتەتىن ءسات، پرەزيدەنت ءار تاپسىرماسىنا جاۋاپتى ناقتى ادامنىڭ بولۋى»، - دەيدى ول.

اۆتور: ءالي يبرايەۆ