مەملەكەت باسشىسىنىڭ باستامالارىن ورىنداۋعا دەرەۋ كىرىسۋ قاجەت - اسقار مامين
بۇل تۋرالى بۇگىن ۇكىمەت وتىرىسىندا ق ر پرەمەر- ءمينيسترى اسقار مامين ايتتى، دەپ حابارلايدى قازاقپارات ءتىلشىسى.
«مەملەكەت باسشىسى وڭىرلىك ساياساتتى جەتىلدىرۋدىڭ ماڭىزدىلىعىن اتاپ ءوتتى. ەلىمىزدىڭ ءاربىر وڭىرىندە ينفراقۇرىلىمدى جاڭعىرتۋعا، ءار ءوڭىردىڭ ەرەكشەلىگىن ەسكەرە وتىرىپ، حالىقتىڭ تۇرمىس ساپاسى مەن تابىسىن ارتتىرۋ ءۇشىن وزەكتى ماسەلەلەردى شەشۋگە باعىتتالعان ناقتى جوبالار ىسكە اسىرىلاتىن بولادى. ءار مەملەكەتتىك ورگان، ءاربىر جەرگىلىكتى اتقارۋشى ورگان مەملەكەت باسشىسىنىڭ تاپسىرمالارى مەن باستامالارىن ورىنداۋعا دەرەۋ كىرىسۋى قاجەت»، - دەدى اسقار مامين.
ونىڭ اتاپ وتۋىنشە، مەملەكەت باسشىسىنىڭ جولداۋىنداعى بارلىق باعىتتاردى ىسكە اسىرۋ بويىنشا جالپىۇلتتىق جوسپار دايىندالاتىن بولادى.
«مەملەكەتتىك ورگاندارعا جالپىۇلتتىق جوسپار بويىنشا ءوز ۇسىنىستارىن ۇلتتىق ەكونوميكا مينيسترلىگىنە 3-قىركۇيەككە دەيىن ەنگىزۋدى تاپسىرامىن. ۇلتتىق ەكونوميكا مينيسترلىگى جالپىۇلتتىق جوسپار جوباسىن 4-قىركۇيەككە دەيىن پرەمەر-ءمينيستردىڭ كەڭسەسىنە ەنگىزسىن. كەلەسى وتىرىستا ءبىز ونى قاراپ، مەملەكەت باسشىسىنىڭ بەكىتۋىنە ەنگىزۋ ءۇشىن ماقۇلداۋىمىز قاجەت»، - دەدى پرەمەر-مينيستر.
