فۋتبول: كريشتيانۋ رونالدۋ قۇرامالار تاريحىندا رەكوردتىق ناتيجەگە قول جەتكىزدى
2022 -جىلعى الەم چەمپيوناتىنىڭ ىرىكتەۋ سايىسىندا پورتۋگاليا قۇراماسى ءوز الاڭىندا يرلانديانى قابىلدادى. الدىمەن 45-مينۋتتا يرلانديالىق دجون ەگان ەسەپ اشقانىمەن، ماتچ سوڭىندا ك. رونالدۋ مىقتىلىعىن تانىتتى. ول 89-مينۋتتا تارازى باسىن تەڭەستىرىپ، ءوزىنىڭ قۇراما ساپىنداعى 110 گولىن سوقتى. وسىلايشا رونالدۋ ءوز سپورتتىق جولىندا قارسىلاستار قاقپاسىنا 109 دوپ ەنگىزگەن يراندىق شابۋىلشى الي داەيدىڭ كورسەتكىشىنەن اسىپ ءتۇستى. ال 96-مينۋتتا رونالدۋ تاعى ءبىر گولدىڭ اۆتورى اتانىپ، كومانداسىنا جەڭىس اپەردى. ءبىرىنشى تايمدا 15-مينۋتتا ونىڭ تەپكەن 11 مەترلىك ايىپ دوبىن يرلانديالىق قاقپاشى گەۆين بازۋنۋ قايتارعان بولاتىن.
پورتۋگاليا قۇراماسى ا توبىندا 10 ۇپايمەن ءبىرىنشى ورىندا كەلەدى. بۇدان بۇرىن ك. رونالدۋ يتاليانىڭ «يۋۆەنتۋس» كومانداسىنان اعىلشىننىڭ «مانچەستەر يۋنايتەد» كلۋبىنا قايتا ورالعان ەدى.
ەسكە سالا كەتەيىك، بۇدان بۇرىن قازاقستان قۇراماسىنىڭ ۋكراينامەن تاعى دا تەڭەسكەنىن جازعان بولاتىنبىز.
