جامبىلداعى جارىلىستان قازا تاپقان اسكەري پروكۋروردىڭ وتباسىنا مەملەكەتتىك ناگرادا تاپسىرىلدى

نۇر-سۇلتان. قازاقپارات - بۇگىن باس پروكۋراتۋرادا جامبىل وبلىسىنىڭ بايزاق اۋدانىنداعى جارىلىس كەزىندە قازا تاپقان وڭتۇستىك ءوڭىردىڭ اسكەري پروكۋرورى ارمان قۋانىش ۇلى قاپەزوۆتى ەسكە الدى، دەپ حابارلايدى قازاقپارات ق ر باس پروكۋراتۋراسىنىڭ باسپا ءسوز قىزمەتىنە سىلتەمە جاساپ.

ءىس-شاراعا پروكۋراتۋرا قىزمەتكەرىنىڭ اناسى - ءدىلدا قاپەزوۆا، جۇبايى - اسەمگۇل قاپەزوۆا، بالالارى، جاقىن تۋىستارى، سونداي-اق باس پروكۋراتۋرا ۇجىمى قاتىستى.

مەملەكەت باسشىسىنىڭ تاپسىرماسى بويىنشا عيزات نۇرداۋلەتوۆ ءدىلدا قاپەزوۆاعا I دارەجەلى «ايبىن» وردەنىن تاپسىردى. ونىڭ ۇلىن قىزمەتتىك بورىشىن اتقارۋ كەزىندە كورسەتكەن باتىلدىعى مەن جانقيارلىعى ءۇشىن قايتىس بولعاننان كەيىن ماراپاتتاعان بولاتىن.

اسكەري پروكۋروردىڭ اناسىنا ۇلىن جانە ناعىز وفيتسەردى لايىقتى تاربيەلەگەنى ءۇشىن العىس ءبىلدىردى.

ءوز كەزەگىندە، قاپەزوۆتەر جانۇياسى جاقىندارىن جوعارى ناگرادامەن ماراپاتتاعانى ءۇشىن پرەزيدەنتكە ريزاشىلىق ءبىلدىردى.

باس پروكۋرور ءوز سوزىندە ارمان قاپەزوۆتىڭ پروكۋراتۋرا جۇيەسىندە 24 جىل جۇمىس ىستەپ، جاۋاپكەرشىلىگى مول جانە بىلىكتى باسشى بولعانىن، ءوزىنىڭ اسكەري بورىشىن سوڭىنا دەيىن ابىرويمەن ورىنداعانىن اتاپ ءوتتى.

مارقۇمنىڭ تۋىستارىنا ارناعان سوزىندە ع. نۇرداۋلەتوۆ پروكۋراتۋرا ورگاندارى ونىڭ وتباسىن قولداۋعا قاجەتتى بارلىق شارالاردى قابىلدايتىنىن جەتكىزدى. ول ارمان قاپەزوۆتىڭ ەرلىك ىستەرى بولاشاق ۇرپاق ءۇشىن، ەڭ الدىمەن، پروكۋراتۋرانىڭ جاس قىزمەتكەرلەرى ءۇشىن ءاردايىم ۇلگى بولاتىنىن ەرەكشە اتاپ ءوتتى.