توقايەۆ: جەر قويناۋىن يگەرۋ مۇمكىندىگى تىنىش كابينەتتەردە شەشىلمەۋى كەرەك
ق ر پرەزيدەنتى قاسىم-جومارت توقايەۆ قازاقستان حالقىنا كەزەكتى جولداۋىندا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«اسىرەسە گەولوگيالىق بارلاۋ جانە جەر قويناۋىن كەشەندى زەرتتەۋ سالاسىنا سەرپىن كەرەك. ۇلت جوسپارى اياسىنداعى گەولوگيالىق اقپاراتتاردىڭ اشىق بازاسىن قۇرۋ رەفورماسى لوگيكالىق تۇيىنىنە جەتكىزىلۋى ءتيىس. ول بازانىڭ ينۆەستورلارعا قولجەتىمدىلىگى قامتاماسىز ەتىلسىن. جەر قويناۋى - بۇل ۇلتتىق يگىلىك. وعان قولجەتىمدىلىك ماسەلەسىن كۋلۋارلىق تالقىلاۋلار ارقىلى تىنىش كابينەتتەردە شەشۋ زاڭنان تىس ارەكەتكە جاتقىزىلۋى كەرەك. ءتيىستى ورگاندار وسى ماسەلە بويىنشا باقىلاۋدى قامتاماسىز ەتەدى»، - دەدى پرەزيدەنت ءوز جولداۋىندا.
سونىمەن بىرگە، ول بۇدان بىلاي مەملەكەت بانكيرلەرگە كومەكتەسپەيتىنىن ەسكەرتتى.
«سترەستىك اكتيۆتەردى ازايتۋ جونىندەگى جۇمىستاردىڭ ماڭىزى زور. ءبىز شەشىم قابىلدادىق: مەملەكەت بانكيرلەرگە كومەكتەسپەۋى كەرەك. ونىمەن بىرگە بۇعاتتالعان اكتيۆتەردى ەكونوميكالىق اينالىمعا قايتارۋ ماڭىزدى. ءبىراق ول تەك قانا نارىقتىق نەگىزدە ءجۇرۋى كەرەك. ول ءۇشىن زاڭنامالىق بازا قاجەت. ۇكىمەت قارجى نارىعىن رەتتەۋ جانە دامىتۋ اگەنتتىگىمەن بىرگە جىل اياعىنا دەيىن پارلامەنتكە زاڭ جوباسىن ۇسىنۋى ءتيىس»، - دەدى مەملەكەت باسشىسى.
اۆتور: ەسىمجان ناقتىباي
