ەگەمەندىگىمىز بەن اۋماقتىق تۇتاستىققا قاستاندىق جاساتۋعا جول بەرمەيمىز - پرەزيدەنت

بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا ارنالعان جولداۋىن جاريالاۋ كەزىندە ءمالىم ەتتى، دەپ حابارلايدى قازاقپارات.

«ۇلتتىڭ ۇيىسۋى ودان ءارى دامۋدىڭ باستى فاتورى. قازىر قازاقستان مۇلدە جاڭا داۋىرگە قادام باستى. سوعان سايكەس، قوعامدىق ءومىردىڭ بارلىق سالاسى تۇبەگەيلى وزگەرۋدە. جاھاندى تۇراقسىزدىق جايلاپ، كوپتەگەن جاڭا سىن- قاتەر پايدا بولىپ جاتقان كەزدە، ءبىز باعدارىمىزدى بەكەمدەپ، بولاشاققا كوزقاراسىمىزدى ايقىنداي ءتۇسۋىمىز قاجەت.

«بىرلىگىمىز - ءارالۋاندىقتا» دەگەن باستى قاعيدامىز ەشقاشان وزگەرمەيدى!»، - دەدى مەملەكەت باسشىسى.

وسى ورايدا پرەزيدەنت ەتنوسارالىق قاتىناستاردىڭ ۇيلەسىمدى دامۋى مەملەكەتتىك ساياساتتىڭ ماگيسترالدى باعىتتارىنىڭ ءبىرى بولىپ قالا بەرەتىنىن، ءبىزدىڭ ازاماتتار ءۇشىن كەلىسىم مەن تولەرانتتىلىق ءومىردىڭ ءمانى ەكەنىن اتاپ ءوتتى.

«ءبىز كونستيتۋتسياعا سايكەس - ءبىرىڭعاي ۇلتپىز. ءبىزدىڭ كۇشىمىز ءسوزسىز وسىندا»، - دەدى ق. توقايەۆ. سونىمەن قاتار پرەزيدەنت راديكاليزمنىڭ كەز كەلگەن فورماسىنا توسقاۋىل قويىلاتىنىن ايتا كەلە: «ءبىزدىڭ مەملەكەتتىك ەگەمەندىگىمىزگە جانە اۋماقتىق تۇتاستىققا قاستاندىق جاساتۋعا جول بەرمەيمىز. قوعامداعى بىرلىك پەن كەلىسىمدى كوزدىڭ قاراشىعىنداي ساقتاۋىمىز كەرەك. ەتنوسارالىق جانە كونفەسسياارالىق قاتىناستىڭ قانشالىقتى ماڭىزدى ەكەنىن بارلىق ازاماتىمىز ءتۇسىنۋ قاجەت. ءبىز قاشاندا الاۋىزدىققا قارسى تۇرا بىلگەن ەلمىز. ادامدى تىلىنە، ۇلتىنا ناسىلىنە قاراپ كەمسىتۋگە، بىرەۋدىڭ نامىسىنا تيۋگە جول بەرمەيمىز، زاڭ بويىنشا جاۋاپقا تارتامىز. كونستيتۋتسياعا قايشى مۇنداي جاۋاپسىز قادامدار ەلىمىزدىڭ نەگىزگى مۇددەلەرىنە زيان كەلتىرەدى»، - دەدى توقايەۆ جولداۋىندا.

اۆتور: رۋسلان عابباسوۆ