جامبىلداعى جارىلىس: بەتىنە تەرەزە سىنىعى تيگەن ايەل جاعدايىن ايتتى - ۆيدەو

نۇر-سۇلتان. قازاقپارات - جامبىل وبلىسىنداعى جارىلىستان كەيىن مەيرامحانا ىشىندە تەرەزە شاعىلىپ، ايەلدىڭ بەتىنە شاشىلعانى ءتۇسىپ قالعان ۆيدەو كوپشىلىكتى بەي-جاي قالدىرمادى.

زارداپ شەككەن ايەل قازىر جاعدايى قانداي ەكەنىن ايتىپ، الاڭداعان ادامدارعا العىسىن ءبىلدىردى، - دەپ حابارلايدى Tengrinews.kz ءتىلشىسى AIBAT جاڭالىقتار قىزمەتىنە سىلتەمە جاساپ.

ۆيدەو كەيىپكەرىنىڭ ايتۋىنشا، ول ارىپتەسىمەن بىرگە جۇمىستان كەيىن تارازدان 30 شاقىرىمداي جەردە ورنالاسقان كافەگە بارعان.

«كولىكپەن كەلە جاتقاندا مەن قويۋ قارا ءتۇتىن شىعىپ جاتقانىن كوردىم جانە دالا ورتەنىپ جاتقان بولار دەپ ويلادىم. مەن ءتىپتى ول جاقتا اسكەري قويما بار ەكەنىن دە بىلمەيمىن. جارىلىس ەستىلگەندە تاپسىرىس بەرىپ ەندى عانا بولعان ەدىك. نە بولعانىن كورۋ ءۇشىن تۇرىپ، تەرەزەگە قارادىم. بۇلاي بولادى دەپ ويلاعان جوقپىن»، - دەيدى ايەل.

ونىڭ ايتۋىنشا، جارىلىس كەزىندە تەرەزە سىنىعى بەتىنە شاشىراپ، قۇلاعى بىتەلىپ قالعان.

«ەسەڭگىرەپ قالدىم. اۋرۋحاناعا بارماي، بىردەن قالاعا، ءدارىحاناعا باردىق. بەتىمدەگى اينەك سىنىقتارىن ءوزىم الىدىم. ون شاقتى اينەك سىنىعىن الدىم. ۇيگە كەلگەن سوڭ، جارانى جۋىپ، تاڭدىم. قاتتى شوشىنىپ قالعاندىقتان، ەشقايدا شىقپاي ۇيدە وتىردىم، ۇيقتاي المادىم، ءتىپتى جۇمىسقا دا بارمادىم. تۋىستارىمنىڭ كوبى ماعان نە بولعانىن ءالى بىلمەيدى»، - دەيدى ول.

زارداپ شەككەن ايەل قازىر جاعدايى جاقسى ەكەنىن ايتىپ، جاعدايىن سۇراعاندارعا العىسىن ايتتى.

ايتا كەتەيىك، بۇعان دەيىن جەلىدە جامبىل وبلىسىنداعى جارىلىستان كەيىن مەيرامحانا ىشىندە تۇسىرىلگەن ۆيدەو تارادى. وندا جارىلىستان كەيىن عيماراتتىڭ تەرەزەسى شاعىلىپ، ايەلدىڭ بەتىنە شاشىلعان.

ۆيدەو اسكەري بولىمشەگە جاقىن ورنالاسقان ءدامحانانىڭ بەينەباقىلاۋ كامەراسىنا جازىلىپ قالعان.