توقايەۆ: ورتالىق ازياداعى كوشباسشىلىق ءرولىمىزدى كۇشەيتۋىمىز كەرەك

نۇر-سۇلتان. قازاقپارات - ستراتەگيالىق ماقساتىمىز ورتالىق ازياداعى كوشباسشىلىق ءرولىمىزدى كۇشەيتۋ.

بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جولداۋى بارىسىندا ايتتى، دەپ حابارلايدى قازاقپارات ءتىلشىسى.

«مەنىڭ قازاقستان حالقىنا بيىلعى جولداۋىم مىناداي ماسەلەلەرگە ارنالدى. ءبىرىنشى - پاندەميادان كەيىنگى كەزەڭدەگى ەكونوميكالىق دامۋ. ورتالىق ازياداعى ەكونوميكاسى ەڭ اۋقىمدى ەل سانالاتىن قازاقستان قازىر پاندەميانىڭ زاردابىن تارتۋدا. دەگەنمەن، قيىندىقتارعا قاراماستان باعدارىمىزدى بەرىك ۇستانىپ كەلەمىز. ءبىز ورتا مەرزىمدى ەكونوميكالىق ساياساتىمىزدى ايقىنداپ، مەملەكەتتىك باستامالاردى رەتتەۋ ءۇشىن 2025 -جىلعا دەيىن دامۋدىڭ ۇلتتىق جوسپارىن جانە مەملەكەتتىك جوسپارلاۋدىڭ جاڭا جۇيەسىن قابىلدادىق. ۇلتتىق جوبالار بەكىتىلەتىن بولادى. ستراتەگيالىق ماقساتىمىز - ورتالىق ازياداعى كوشباسشىلىق ءرولىمىزدى كۇشەيتۋ جانە الەمدىك ەكونوميكاداعى ورنىمىزدى نىعايتۋ»، - دەدى ق ر پرەزيدەنتى.

مەملەكەت باسشىسى ەكونوميكامىزعا تىكەلەي ينۆەستيتسيا تارتۋ ءىسىن جالعاستىرۋدىڭ جاڭا ءتاسىلى رەتىندە ستراتەگيالىق ينۆەستيتسيالىق كەلىسىم ۇعىمى ەنگىزىلگەندىگىن اتاپ ءوتتى. «كۆازيمەملەكەتتىك سەكتوردى وڭتايلاندىرۋ ءۇشىن ناقتى شارالاردى قولعا الدىق. «بايتەرەك» جانە «قازاگرو» حولدينگتەرىن بىرىكتىردىك. ەنشىلەس كومپانيالار 2 ەسە ازايدى. ولاردىڭ شتات سانىن 1,5 ەسە قىسقارتتىق. جاڭا قۋاتتى دامۋ ينستيتۋتىن قۇردىق»، - دەدى قاسىم-جومارت توقايەۆ.