قىركۇيەكتە كۇن رايى قانداي بولادى؟

نۇر-سۇلتان. قازاقپارات - كۇز كەلىپ، تابيعات تا وزگەرىپ سالار مەزگىل تاياپ كەلەدى.

تاڭدا قىراۋ ءتۇسىپ، كۇن دە سۋىتا باستايدى. ەندەشە وسى مەزگىلدىڭ العاشقى ايى قىركۇيەكتە كۇن رايى قانداي بولادى؟ بۇل جايىندا قازگيدرومەت حابارلادى.

قازاقستان اۋماعىنىڭ باسىم بولىگىندە، كوپجىلدىق دەرەكتەر بويىنشا، ۇسىك قىركۇيەكتىڭ ءبىرىنشى جارتىسىندا، وڭتۇستىك وبلىستاردا ايدىڭ سوڭىندا عانا بايقالۋى مۇمكىن. الايدا كونسۋلتاتيۆتىك بولجامعا سايكەس، ايدىڭ باسىندا ەلدىڭ سولتۇستىك جانە ورتالىق ايماقتارىندا توپىراق بەتىندە 2 گرادۋسقا دەيىن اياز بولادى دەپ بولجانۋدا.

قىركۇيەك ايىنىڭ باسىندا تسيكلوننىڭ جانە ونىمەن بايلانىستى اتموسفەرالىق فرونتتاردىڭ اسەرىنەن كۇن رايىنىڭ تۇراقسىز سيپاتى ەلدىڭ باتىس، شىعىس ايماقتارىندا جانە وڭتۇستىك- شىعىستىڭ تاۋلى ايماقتارىندا بايقالادى. ونكۇندىكتىڭ سوڭىندا قازاقستاننىڭ سولتۇستىك-باتىس جارتىسىندا كۇن كۇركىرەپ، بۇرشاق جاۋىپ، جەل كۇشەيىپ، ەكپىنى 15-23 م/س- گە جەتەدى.

ايدىڭ ءبىرىنشى ون كۇندىگىندە باتىس سۋىق انتيتسيكلونىنىڭ، باتىس وڭىرلەرگە كىرۋى كۇندىز اۋا تەمپەراتۋراسىنىڭ +30+35 گرادۋستان +17+25 گرادۋسقا دەيىن تومەندەۋىنە اكەلەدى. سونىمەن قاتار رەسپۋبليكانىڭ قالعان اۋماعىندا جەرورتا تەڭىزىنىڭ شىعىس جاعالاۋىنان جىلى اۋا ماسسالارىنىڭ وڭتۇستىك-باتىسقا شىعارىلۋىمەن رەسپۋبليكانىڭ سولتۇستىگىندە، ورتالىعىندا، شىعىسىندا اۋا تەمپەراتۋراسىنىڭ كۇندىز +13+20 گرادۋستان +23+30 گرادۋسقا دەيىن، وڭتۇستىگىندە، وڭتۇستىك- شىعىسىندا +25+32 گرادۋستان +28+37 گرادۋسقا دەيىن وزگەرۋى كۇتىلەدى.

ەكىنشى ون كۇندىكتىڭ باسىندا باتىس وڭىرلەردەن سۋىق انتيتسيكلون ەلدىڭ سولتۇستىگى مەن ورتالىعىنا سالقىن كۇن رايىن اكەلەدى. ناتيجەسىندە اۋا تەمپەراتۋراسىنىڭ تومەندەۋى كۇتىلەدى.

ايدىڭ ەكىنشى جارتىسىندا تەمپەراتۋرالىق فوننىڭ كوتەرىلۋى حالىقتىق كۇنتىزبەدە «ءۇندى جازى» دەپ اتالادى.

الايدا اۋا تەمپەراتۋراسى قازاقستاننىڭ سولتۇستىگىندە، ورتالىعىندا جانە شىعىسىندا تۇندە +5+13 گرادۋستان -5+10 گرادۋسقا دەيىن، كۇندىز +20+28 گرادۋستان +15+20 گرادۋسقا دەيىن؛ ەلدىڭ وڭتۇستىگىندە جانە باتىسىندا تۇندە +7+15 گرادۋستان 0,+5 گرادۋسقا دەيىن، كۇندىز +25+30 گرادۋستان +17+22 گرادۋسقا دەيىن اۋىتقيدى.

ەسكەرتپە: ءبىر ايعا ارنالعان كونسۋلتاتسيالىق بولجام سينوپتيكالىق جاعدايدىڭ وزگەرۋىنە قاراي تۇزەتىلۋى مۇمكىن جانە ونكۇندىك بولجامدارمەن ناقتىلاناتىن بولادى.

massaget.kz