الماتىدا قانشا كوپبالالى وتباسى تۇرادى؟
الماتى قالاسىنىڭ الەۋمەتتىك ءال-اۋقات باسقارماسىنىڭ باسشىسى نازيرا توعىزبايەۆانىڭ ايتۋىنشا، مەگاپوليستە كوپبالالى جانە از قامتىلعان وتباسىلارعا ارنالعان «باقىتتى وتباسىنىڭ» 9 ورتالىعى بار.
«الماتىدا 24426 كوپبالالى وتباسى تۇرادى. ورتالىقتارعا 4 مىڭ ادام تىركەلگەن. 30500 الماتىلىق اقپاراتتىق-كونسۋلتاتسيالىق جانە رەسۋرستىق قولداۋ الدى، 3200 ءوتىنىش بەرۋشىگە ادىستەمەلىك جانە قۇقىقتىق كومەك كورسەتىلدى، 3 مىڭ تۇرعىن بازالىق ترەنينگتەردەن ءوتتى جانە 4 مىڭ تۇرعىن وقۋ كۋرستارىن اياقتادى»، - دەيدى ول.
«باقىتتى وتباسى» ورتالىقتارىمەن قاتار الاتاۋ اۋدانىنىڭ از قامتىلعان وتباسىلارىنا ارنالعان ءداستۇرلى قولونەردى دامىتۋ ورتالىعى جۇمىس ىستەيدى، ونىڭ ماقساتى - بالاعا سالت-ءداستۇر، ادەت-عۇرىپ، قولونەردى ۇيرەتۋ.
«ورتالىقتا كوپبالالى انالار ماماندىق الا الادى، قازىردىڭ وزىندە 575 ايەل كيىم ديزاينى، كىرپىك ۇزارتۋ، مانيكيۋر، قۇراق كورپە تىگۋ، تىگىن جانە ماسساج كۋرستارىنان ءوتىپ جاتىر»، - دەدى نازيرا توعىزبايەۆا.
بۇل ءداستۇرلى قولونەر ورتالىعىنا 1200 بالا كەلەدى. ولارعا دومبىرادا ويناۋدى، اكتەرلىكتى، ءبيدى، قولونەردى ۇيرەتەدى، بالالار ورىس جانە اعىلشىن، ۆوكال جانە حورەوگرافيا كۋرستارىنان وتەدى. بۇل رەتتە قالادا «باستاۋ بيزنەس» باعدارلاماسى بويىنشا انالارعا كاسىپكەرلىك نەگىزدەرىن ۇيرەتۋگە باعىتتالعان «ىسكەر ANA « جوباسى، سونداي-اق «ەڭبەك» مەملەكەتتىك باعدارلاماسى بويىنشا قىسقا مەرزىمدى كۋرستار جۇزەگە اسىرىلىپ جاتىر.
«ماماندار كوپبالالى انالارعا جەكە كاسىپ اشۋعا جانە ونى جۇرگىزۋگە كومەكتەسەدى. ول ءۇشىن گرانتتار، وقۋ كۋرستارى جانە باسقا دا كومەك ۇسىنىلادى. بولاشاقتا كاسىپ اشقان سوڭ، كاسىپپەن اينالىساتىن انالارعا قولداۋ كورسەتىلەدى. بۇگىندە كوميسسيا 757 ايەلگە گرانتتى ماقۇلدادى»، - دەدى سپيكەر.
الەۋمەتتىك ءال-اۋقات باسقارماسىنىڭ باسشىسى قارتتاردى قولداۋ ءۇشىن الماتىدا بەلسەندى قارتايۋعا ارنالعان تاعى 9 ورتالىق بار ەكەنىن قوستى. ولارعا كۇنىنە 1000 نان استام ادام كەلەدى. مۇندا ولارعا بەلسەندى جانە سالاۋاتتى ءومىر سالتى تانىستىرىلادى.
زەينەتكەرلەر يوگا تەراپيالىق ساباقتارىنا، سكانديناۆيالىق جاياۋ ءجۇرۋ جانە جاتتىعۋ تەراپياسىنا قاتىسادى.
