ب ۇ ۇ ق ك تالىپتەرگە بەيبىت حالىقتىڭ اۋعانستاننان شىعىپ كەتۋىنە مۇمكىندىك بەرۋىن مىندەتتەدى

نۇر- سۇلتان. قازاقپارات – ب ۇ ۇ قاۋىپسىزدىك كەڭەسى «تاليبان» قوزعالىسىنان ءوز مىندەتتەرىن ورىنداپ، اۋعانستاننان كەتۋدى قالايتىندارعا مۇمكىندىك بەرۋدى تالاپ ەتەتىن قاراردى ماقۇلدادى،

دەپ حابارلايدى قازاقپارات Euronews-كە سىلتەمە جاساپ.

فرانسيا، ۇلى بريتانيا جانە ا ق ش جاساعان قاراردى قولداپ قاۋىپسىزدىك كەڭەسىنىڭ 13 مۇشەسى داۋىس بەردى. رەسەي مەن قىتاي قالىس قالدى.

قاۋىپسىزدىك كەڭەسى 2593 قارارىن قابىلدادى، وندا اۋعانستاننان كەتكىسى كەلەتىن بارلىق اۋعاندىقتار نەمەسە شەتەلدىك ازاماتتاردىڭ كەز كەلگەن ۋاقىتتا اۋە نەمەسە قۇرلىق شەكارالارى ارقىلى ەش كەدەرگىسىز ەلدەن كەتۋىنە مۇمكىندىك بەرەتىنى كورسەتىلگەن. قابىلدانعان قارارعا سايكەس، اۋعانستان تەرروريستەردىڭ پلاتسدارمى رەتىندە پايدالانىلماۋى كەرەك. گۋمانيتارلىق كومەك كورسەتۋگە بار كۇشتى سالۋعا باستى نازار اۋدارىلىپ وتىر.

فرانسيا پرەزيدەنتى ەممانۋەل ماكروننىڭ پىكىرىنشە، تالىپتەر تەرروريزمگە قارسى كۇرەسىپ، گۋمانيتارلىق قۇقىقتار مەن ادام قۇقىعى، سونىڭ ىشىندە اۋعان ايەلدەرىنىڭ قۇقىعىن قورعايتىن بولسا، ولاردى مويىنداۋ ماسەلەسىن قاراستىرۋعا بولادى.

اۆتور: اقبوپە ءابدراسۋل