تاراز ماڭىنداعى جارىلىستان امان قالعان ءورت ءسوندىرۋشى وقيعا تۋرالى ايتىپ بەردى
ول جامبىل وبلىسىنداعى وقيعا تۋرالى ايتتى.
قاراۋىل باستىعى بايبەك سەمبەكوۆ تاراز ماڭىنداعى جارىلىستاردان امان قالعان. «ستۋديا 7» جۋرناليستەرىنىڭ ايتۋىنشا، ول قازىر ەمدەلىپ جاتىر.
«وقيعا ورنىنا جەتكەندە، مەن بىردەن اسكەري قىزمەتكەرلەردىڭ بىرىنە باردىم. قويمادا نە بار ەكەنىن سۇرادىم... ولار ارنايى جارىلعىش زاتتار جوق ەكەنىن ايتتى. ءبىز بىردەن جۇمىسىمىزعا كىرىستىك. مەن سۋ كوزىن ىزدەي باستادىم. ءبىزدىڭ كولىكتەردە ماكسيمۋم 5-8 توننا سۋ بار، ءبىراق ول جەتكىلىكسىز بولار ەدى»، - دەپ ەسكە الدى سەمبەكوۆ.
«بارلىق كولىك قويماعا جاقىنداسىن دەگەن بۇيرىق بولدى. مەن كولىككە وتىردىم، جانىمدا ءبىر قىزمەتكەر مەن جۇرگىزۋشى بولدى. كولىككە وتىرا سالىسىمەن، جۇرۋگە بۇيرىق بەردىم. سول ساتتە جارىلىس بولدى».
«ءبىز وتىرعان كولىك اۋدارىلدى. ارتقى ورىندىققا ءوتىپ، قالاي شىققانىمىز قازىر ەسىمدە جوق. ەسىك نەمەسە تەرەزە ارقىلى شىقتىق. ادامدار ايعايلاپ، جىلاپ جۇرگەندەر بولدى».
«جويقىن تولقىن بولدى. بىردەڭە ايتايىن دەسەم، سويلەي المايمىن. اۋزىما اينەك سىنىقتارى تولىپ قالعان. قان تۇكىرىپ جاتتىم. ءبارىنىڭ جاعداي سول، كولىكتىڭ الدىڭعى تەرەزەسى سىنىپ كەتكەن».
«ءبىرىنشى جارىلىستان كەيىن ون مينۋت وتكەن سوڭ، ەكىنشىسى بولدى. سول كەزدە بىرەۋ: «ۇرىسقا!» - دەپ ايعايلادى. ءبىز ءبارىمىز جەرگە جاتتىق. بىرەۋدىڭ اياعى سىنعان. ءبىر- بىرىمىزگە كومەكتەسىپ، ول جەردەن كەتىپ قالدىق. باسقا امالىمىز بولمادى، تەك ول جەردەن كەتۋ كەرەك بولدى».
بايبەك سەمبەكوۆ كەيبىر ارىپتەستەرىنىڭ قايتىس بولعانىن، كەيىن تەلەفون ارقىلى بىلگەن.
ءورت سوندىرۋشىگە «جارىلىستار بولۋى مۇمكىن ەكەنىن ەسكەرتپەگەندەرگە شاعىمىڭىز بار ما» دەگەن سۇراق قويىلدى. ول قاتارداعى اسكەري قىزمەتكەرلەر قاۋىپ تۋرالى بىلمەۋى مۇمكىن دەگەن بولجاممەن ناقتى جاۋاپ بەرگەن جوق.
بۇعان دەيىن قۇتقارۋشىلار اسىل مۇحامبەتجانوۆ پەن الماز تۇرسىنوۆ توتەنشە جاعداي ورنىنا كەلگەندە ءورت سوندىرۋشىلەرگە جارىلىس بولمايتىنى ايتىلعانى تۋرالى مالىمدەگەن بولاتىن. كەيىنىرەك بۇل مالىمدەمەلەرگە توتەنشە جاعدايلار مەن قورعانىس مينيسترلىگىنىڭ باستىعى تۇسىنىكتەمە بەردى.
