بىشكەكتە جامبىلدىڭ قىرعىز تىلىنە اۋدارىلعان شىعارمالارىنىڭ تانىستىرىلىمى ءوتتى

نۇر- سۇلتان. قازاقپارات - 2021 -جىلدىڭ 30-تامىزى كۇنى بىشكەك قالاسىندا حالىقارالىق تۇركى اكادەمياسىنىڭ ۇيىمداستىرۋىمەن جىر الىبى جامبىل جابايەۆتىڭ 175 جىلدىق مەرەيتويىنا جانە قىرعىز رەسپۋبليكاسى تاۋەلسىزدىگىنىڭ 30 جىلدىعىنا وراي ارنايى عىلىمي كونفەرەنتسيا ءوتتى، دەپ حابارلايدى قازاقپارات.

ماناس جانە ش. ايتمانوۆ ۇلتتىق اكادەمياسىندا وتكەن باسقوسۋعا حالىقارالىق تۇركى اكادەمياسىنىڭ پرەزيدەنتى دارحان ءقىدىرالى، قازاقستان رەسپۋبليكاسى مادەنيەت جانە سپورت مينيسترلىگى مادەنيەت كوميتەتىنىڭ ءتوراعاسى اقان ابدۋاليەۆ، قىرعىز رەسپۋبليكاسى ماناس جانە ش. ايتماتوۆ ۇلتتىق اكادەمياسى پرەزيدەنتى توپچۋبەك تۋرگۋناليەۆ، قىرعىز رەسپۋبليكاسىنىڭ ۇلتتىق جازۋشىلار وداعىنىڭ ءتوراعاسى نۇرلانبەك كالىبەكوۆ، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت، م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ، سونىمەن بىرگە ءبىرقاتار قازاق- قىرعىز زيالى قاۋىمىنىڭ وكىلدەرى قاتىستى.

«جامبىل - قازاق پەن قىرعىزعا ورتاق تۇلعا. «سۇيەگىم - قازاق، ەتىم - قىرعىز» دەپ ايتاتىن اقىننىڭ قوڭسى قونعان قىرعىز حالقىنا دەگەن رياسىز كوڭىلى انىق اڭعارىلادى. الاتاۋدىڭ ابىزى وسى قىرىنان دا تۇركى بىرلىگىنە قىزمەت ەتكەنى بارشاعا عيبرات»، ̶ دەدى اكادەميا باسشىسى القالى جيىندا.

كونفەرەنتسيا بارىسىندا جامبىلدىڭ قىرعىز تىلىنە اۋدارىلعان تاڭدامالى شىعارمالارى («جامبىل جابايەۆ. تاندالگان چىگارمالار») كوپشىلىك نازارىنا ۇسىنىلدى. قۇندى ەڭبەكتى قىرعىز تىلىنە بەلگىلى ادەبيەتتانۋشىلار - كەريمبەك كادىراكۋنوۆ پەن تۇگولباي كازاكوۆ ءتارجىمالاعان. سونىمەن قاتار، كورنەكتى مەملەكەت قايراتكەرى، بەلگىلى جازۋشى كانىبەك يماناليەۆتىڭ «تاگاي بيي (مۋحاممەد كىرگىز)» اتتى تاريحي پوۆەسىنىڭ تۇساۋكەسەرى ءوتتى.

اتالعان ەڭبەك ХVI عاسىردا جاساپ، قىرعىز ەلىنىڭ باسىن بىرىكتىرىپ، ەل بولۋعا نەگىز قالاعان تاعاي ءبيدىڭ ومىرىنە ارنالعان. تاعىلىمدى شارا قازاق جانە قىرعىز اقىندارىنىڭ قاتىسۋىمەن وتەتىن ⅩⅣ حالىقارالىق الامان ايتىسقا ۇلاستى.