جامبىل وبلىسىنداعى اسكەري بولىمدە جارىلىستار توقتادى، ءورت ءالى جانىپ جاتىر

نۇر-سۇلتان. قازاقپارات - قورعانىس ءمينيسترى وقيعا ورنىندا جامبىل وبلىسىنىڭ اكىمىمەن، توتەنشە جاعدايلار مينيسترىمەن، مەملەكەتتىك ورگانداردىڭ جەدەل شتاب باسشىلارىمەن كەڭەس وتكىزدى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

وقيعا سالدارىن جويۋ ماقساتىندا بارلىق مەملەكەتتىك ورگانداردىڭ، ونىڭ ىشىندە قارۋلى كۇشتەر بولىمشەلەرىنىڭ، توتەنشە جاعدايلار دەپارتامەنتىنىڭ، ىشكى ىستەردىڭ، اكىمدىكتىڭ، مەديتسينالىق مەكەمەلەردىڭ ءىس-قيمىلدارى ۇيلەستىرىلگەن. جامبىل وبلىسىنداعى اسكەري ءبولىمنىڭ ينجەنەرلىك وق-دارىلەر قويماسىندا جارىلىستار توقتادى، دەگەنمەن ءورت جالعاسۋدا.

ينجەنەرلىك وق- دارىلەر جەردەگى قويمالاردا ساقتالادى. قويمالاردا جەر استى ساقتاۋ ورىندارى جوق. وسى اسكەري بولىمدە وق-دارىلەردىڭ باسقا تۇرلەرى (ارتيللەريالىق، رەاكتيۆتى، زىمىراندىق، اتىس) ساقتالمايدى.

«ينجەنەرلىك وق-دارىلەر اراسىندا جارىلىس كەزىندە سىنىقتارى مەن ءىرى قالدىقتارى ۇشاتىن سناريادتار جوق. سونىمەن قاتار ءتۇرلى جارىلعىش زاتتاردىڭ جانىپ، جارىلۋى سالدارىنان سوققى تولقىنى، اۋقىمدى جالىن مەن قاتتى دۇمپۋلەر ورىن الۋى ىقتيمال»، - دەلىنگەن حابارلامادا.

وسىعان دەيىن جارىلىستىڭ اسكەري ءبولىمنىڭ قويماسىنداعى تروتيلدىڭ تۇتىنۋىنان بولۋى ىقتيمال ەكەنى ايتىلعان بولاتىن.

ايتا كەتەيىك، بۇگىن ساعات شامامەن 19:00 دە جامبىل وبلىسىنىڭ بايزاق اۋدانىندا ورنالاسقان اسكەري ءبولىم قويمالارىنىڭ بىرىنەن ءورت شىعىپ، جارىلىس بولدى. جارىلىستان زارداپ شەككەندەر سانى 66 ادامعا جەتتى. ولاردىڭ كوبى جەڭىل جاراقات العاندار، تەك 2 ادامنىڭ عانا جاعدايى اۋىر. زارداپ شەككەندەردىڭ اراسىندا 12 اسكەري قىزمەتشى بار. مەملەكەت باسشىسى قاسىم-جومارت توقايەۆ جامبىل وبلىسىنداعى جاعدايدىڭ باقىلاۋدا ەكەنىن جازدى.