اۋعانستاندىق ستۋدەنتتەردى قازاقستانعا تاسىمالداۋ قوسىمشا قارالادى - ءبىلىم مينيسترلىگى
ق ر ءبىلىم جانە عىلىم مينيسترلىگى وسىلاي مالىمدەدى، دەپ حابارلايدى قازاقپارات ءتىلشىسى.
ءبىلىم جانە عىلىم مينيسترلىگىنىڭ باسپا ءسوز قىزمەتى اۋعانستان ستۋندەنتتەرىن قازاقستانعا اكەلۋ ءۇشىن ارنايى چارتەرلىك رەيس جونەلتىلۋى مۇمكىن دەگەن اقپاراتقا قاتىستى تۇسىنىكتەمە بەردى.
«قازىرگى تاڭدا ق ر قۇزىرلى ورگاندارى ەلىمىزدىڭ وقۋ ورىندارىندا وقيتىن اۋعان ستۋدەنتتەرىنە قاتىستى ءتيىستى جۇمىستار جۇرگىزىپ جاتىر. بۇگىنگى تاڭدا اۋعانستانداعى ساياسي- اسكەري احۋالدىڭ ناشارلاۋىنا بايلانىستى اۋعان تاراپىمەن تاسىمالداۋ ماسەلەسىن تالقىلاۋعا مۇمكىندىك جوق. وسى رەتتە اۋعان ستۋدەنتتەرىنىڭ قازاقستانعا كەلۋىنە قاتىستى لوگيستيكالىق ماسەلەلەر قوسىمشا قاراستىرىلاتىن بولادى»، - دەپ جازىلعان ۆەدومستۆونىڭ رەسمي مالىمەتىندە.
ەسكە سالساق، ق ر سىرتقى ىستەر مينيسترلىگى حالىقارالىق اقپارات كوميتەتى ءتوراعاسىنىڭ ورىنباسارى - باسپا ءسوز حاتشىسى ايبەك سمادياروۆ قازاقستاندا ءبىلىم الاتىن اۋعانستان ستۋدەنتتەرى ءبىزدىڭ ەلگە قايتا كىرۋى ءۇشىن ايماقتاعى جاعداي ابدەن تۇراقتانۋى كەرەك ەكەنىن ايتقان بولاتىن.
«قازاقستاندا قازىر وقىپ جاتقان ستۋدەنتتەردىڭ اراسىندا جازعى دەمالىس كەزىندە ەلىنە كەتكەندەر بار. ولار تۋرالى مالىمەتتەر ءتۇسىپ جاتىر بىزگە. وقۋلارىن وسىنداي جالعاستىرعىسى كەلەتىندەرى بار. ءبىز بۇل ماسەلەنى باقىلاۋدا ۇستاپ وتىرمىز. اۋعانستانداعى جاعداي تۇراقتانعان كەزدە ءبىزدىڭ ەلشىلىك مىندەتتى تۇردە ولارعا ءتيىستى ۆيزا بەرەدى. ەكى ارادا اۋە نەمەسە باسقا كولىك قاتىناسى قالىپقا كەلگەن سوڭ قازاقستانداعى وقۋلارىن الاڭسىز جالعاستىرا الادى»، - دەگەن بولاتىن ايبەك سمادياروۆ.
اۆتور: ەسىمجان ناقتىباي
