ەلوردادا سەگىزىنشى قاباتتاعى كارنيزدە تۇرعان جىگىت قۇتقارىلدى - ۆيدەو
وقيعا 23-تامىزدا بولعان. ساعات 14:35-تە «102» نومىرىنە ەر ادامنىڭ سەگىزىنشى قاباتتاعى كارنيزگە شىعىپ العانى جانە قۇلاپ كەتەيىن دەپ تۇرعانى جونىندە حابارلاما كەلىپ تۇسكەن. وقيعا ورنىنا نۇر-سۇلتان قالاسى پوليتسيا دەپارتامەنتىنىڭ پاترۋلدىك پوليتسيا پولكىنىڭ جاساعى كەلىپ جەتتى.
«قايعىلى وقيعانى بولدىرماۋ ءۇشىن پوليتسەيلەر پاتەرگە تومەنگى قاباتتاعى كورشىلەردىڭ بالكونى ارقىلى كىرمەك بولدى. پاتەرگە وتكەن پوليتسيا پولكىنىڭ قىزمەتكەرى اسان قومانوۆ ەر ادامدى بولمەگە كىرۋگە كوندىرىپ تۇردى، ال ەكىنشى پوليتسەي جاسۇلان قىزداربەك جاعدايدى تومەننەن قاداعالاعان. الايدا جىگىت ءتارتىپ ساقشىلارىنىڭ سوزىنە قۇلاق اسپادى. پوليتسيا قىزمەتكەرى ونى اڭگىمەگە اينالدىرىپ تۇرعاندا، ونىڭ ارىپتەسى پاتەرگە جەتتى. جىگىت اڭگىمەگە الدانىپ قالعاندا، ءتارتىپ ساقشىلارى ونى اياعىنان ۇستاپ، پاتەرگە تەرەزەدەن تارتىپ كىرگىزىپ العان. وسىلايشا، ولا قالا تۇرعىنىن وقىس ارەكەتتەن قۇتقارىپ قالدى»، - دەپ باياندادى پوليتسيا دەپارتامەنتىنىڭ باسپا ءسوز قىزمەتىنەن.
23 جاستاعى ەر ادامنىڭ بىرگە تۇراتىن ايەلمەن سوزگە كەلىپ، كەيىن ايەل ونى پاتەردە قالدىرىپ، سىرتىنان جاۋىپ كەتىپ قالعانى انىقتالدى. ىشىمدىك ءىشىپ العان ەر ادام كوشەگە سەگىزىنشى قاباتتاعى بالكون ارقىلى شىقپاق بولدى. اسان قومانوۆ بۇعان دەيىن دە ءبىراز جاقسىلىق جاساعان. ول يت قاۋىپ العان ءۇش جاسار بالانى اكەسىمەن بىرگە اۋرۋحاناعا جەدەل جەتۋىنە جاردەمدەسكەن. سونداي-اق بۇعان دەيىن اسان قومانوۆ پەن ارىپتەسى ابزال جولماحانوۆپەن بىرگە كوشەدە پىشاعى بار ماس ادامدى قارۋسىزداندىرعان.
اۆتور: زارينا تۋعانبايەۆا
