قازاقستاندا قانشا ايەل تەرگەۋشى بار؟
بۇل تۋرالى ق ر ىشكى ىستەر مينيسترلىگى تەرگەۋ دەپارتامەنتىنىڭ باسشىسى سانجار ءادىلوۆ ءمالىم ەتتى، دەپ حابارلايدى قازاقپارات ءتىلشىسى.
«تاۋەلسىزدىك العالى ىشكى ىستەر ورگاندارى ونىڭ ىشىندە تەرگەۋ قىزمەتى سالاسىندا ءبىرقاتار رەفورمالار جۇزەگە اسىپ كەلەدى. مەملەكەت باسشىسىنىڭ تاپسىرماسىنا سايكەس 2020-جىلعى 1- جەلتوقساننان باستاپ قىلمىستىق پروتسەستى تەرگەۋدىڭ ءۇش بۋىندى مودەلى ەنگىزىلدى. بيىل 7 ايدىڭ ىشىندە تەرگەۋشىلەر مەن انىقتاۋشىلار قاداعالاۋشى ورگانداردارمەن بىرلەسىپ 170 مىڭنان استام شەشىم قابىلدادى. ناتيجەسىندە قىلمىستىق ىستەردى قوسىمشا تەرگەۋدى ازايتۋ مۇمكىندىگىنە قول جەتتى»، - دەدى سانجار ءادىلوۆ.
ونىڭ ايتۋىنشا، ىشكى ىستەر ءمينيسترىنىڭ تاپسىرماسىنا سايكەس، ەلىمىزدە ايەل تەرگەۋشى مامانداردى ازىرلەۋ جولعا قويىلدى.
«قازىرگى ۋاقىتتا رەسپۋبليكا بويىنشا 300 دەن استام ايەل تەرگەۋشى ەڭبەك ەتىپ جاتىر. ەلىمىزدە ورىن الاتىن قىلمىستىق ءىستىڭ 95 پايىزىنان استامى تەرگەۋشىلەردىڭ الدىنان وتەدى. تاعى ءبىر جاڭاشىلدىق، ىشكى ىستەر ورگاندارىندا قىلمىستىق سوت ءىستى ەلەكتروندى فورماتتا جۇرگىزۋ قولعا الىندى. ماسەلەن، بيىل 7 ايدىڭ قورىتىندىسى بويىنشا قىلمىستىق تەرگەۋدىڭ 70 پايىزدان استامى ەلەكتروندى فورماتتا ءوتتى»، - دەيدى ول.
بۇعان دەيىن حابارلاعانىمىزداي، بۇگىن ەلوردادا ق ر كونستيتۋتسيا كۇنىنە وراي سوت سالاسى ارداگەرلەرىنىڭ جاس تەرگەۋشىلەرمەن كەزدەسۋى ءوتتى.
