كوروناۆيرۋستىڭ بارلىق بەلگىلى شتامىنان قورعايتىن انتيدەنە انىقتالدى

نۇر-سۇلتان. قازاقپارات - سەنت-لۋيستەگى (ا ق ش) ۆاشينگتون ۋنيۆەرسيتەتى جانىنداعى مەديتسينا مەكتەبىنىڭ عالىمدارى كوروناۆيرۋستىڭ بارلىق بەلگىلى مۋتاتسياسىن بەيتاراپتاندىراتىن انتيدەنەنى تاپتى.

بۇل تۋرالى ءبىلىم مەكەمەسىنىڭ سايتىندا جاريالانعان زەرتتەۋدە ايتىلعان، - دەپ حابارلايدى Tengrinews.kz ءتىلشىسى ريا نوۆوستيگە سىلتەمە جاساپ.

اۆتورلار 43 ۇلگىنى زەرتتەپ، پەتري ىدىسىنداعى SARS- CoV-2 باستاپقى نۇسقامەن ينفەكتسيانىڭ الدىن الۋ جولدارىن تالدادى. كەيىن كەمىرگىشتەردە ەڭ كۇشتى توعىز بەيتاراپتاندىراتىن بولشەكتەر سىنالعان. ءسويتىپ، ەڭ تيىمدىلەرى تاڭدالدى.

زەرتتەۋ ناتيجەسى بويىنشا، SARS2-38 انتيدەنەسى كوروناۆيرۋستىڭ «الفا»، «بەتا»، «گامما»، «دەلتا»، «كاپپا»، «يوتا»، سونداي- اق سيرەك كەزدەسەتىن مۋتاتسيالارعا دا قارسى تۇرا الادى.

عالىمداردىڭ ايتۋىنشا، SARS2-38 ۆيرۋستىڭ وزگەرمەيتىن اقۋىز بولىگىنە قوسىلادى. انىقتالعان انتيدەنەنىڭ بىرەگەي قاسيەتتەرىنىڭ ءبىرى - تومەن كونتسەنتراتسيادا جوعارى بەيتاراپتاندىرۋ قابىلەتى، سونىمەن قاتار ينفەكتسيانىڭ بارلىق نۇسقاسىنا اسەرى.

سونىمەن قاتار، عالىمدار SARS- CoV-2 مۋتاتسيالارىن انىقتادى، بۇل SARS2-38 انتيدەنەسىنىڭ ۆيرۋسپەن كۇرەسۋىنە جول بەرمەيدى. الايدا، بۇل مۋتاتسيالار تەك 0,04 پايىز جاعدايدا كەزدەسەدى.