عالىم- ماتەماتيك وراز ساتىبالدى ۇلى ومىردەن وزدى
وراز ساتىبالدى ۇلى ق. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىندە ماتەماتيكا كافەدراسىنىڭ مەڭگەرۋشىسى بولىپ جۇمىس ىستەدى. فيزيكا- ماتەماتيكا عىلىمدارىنىڭ كانديداتى، پەداگوگيكا عىلىمدارىنىڭ دوكتورى، پروفەسسور، حالىقارالىق اقپاراتتاندىرۋ اكادەمياسىنىڭ اكادەميگى.
«ج و و ۇزدىك وقىتۋشىسى»، قازاقستان رەسپۋبليكاسىنىڭ عىلىمىن دامىتۋداعى ەڭبەگى ءۇشىن» توسبەلگىسىنىڭ يەگەرى. ول 135-تەن استام وقۋ، وقۋ- ادىستەمەلىك جانە عىلىمي جۇمىستىڭ، ونىڭ ىشىندە ەكى مونوگرافيانىڭ، وننان استام وقۋلىق پەن پەداگوگيكالىق، ەكونوميكالىق جانە تەحنيكالىق ماماندىق ستۋدەنتتەرىنە ارنالعان جيىرما بەستەن استام ادىستەمەلىك قۇرالدىڭ اۆتورى. ول ءوزىنىڭ تاجىريبەسىن، ءبىلىمىن، عىلىمي ەرۋديتسياسىن، شىعارماشىلىق يدەيالارىن اسپيرانتتار مەن ستۋدەنتتەرگە جەتكىزدى. كانديداتتىق جانە دوكتورلىق ديسسەرتاتسيالاردىڭ كەڭەسشىسى بولدى. ونىڭ جەتەكشىلىگىمەن بەس كانديداتتىق جانە ءبىر دوكتورلىق ديسسەرتاتسيا قورعالدى.
