ا ق ش- تىڭ بارلاۋ قىزمەتى كوروناۆيرۋستىڭ قالاي شىققانى تۋرالى ورتاق شەشىمگە كەلە المادى

نۇر- سۇلتان. قازاقپارات – ا ق ش- تىڭ بارلاۋ قىزمەتى سەيسەنبى كۇنى پرەزيدەنت دجو بايدەنگە كوروناۆيرۋستىڭ قايدان شىققانى تۋرالى بايانداما جاسادى، الايدا وندا ۆيرۋستىڭ زەرتحانادا جاسالدى ما، الدە تابيعي جولمەن پايدا بولدى ما دەگەن ماسەلەدە ورتاق شەشىم ايتىلماعان.

بۇل تۋرالى قازاقپارات تاسس اگەنتتىگىنە سىلتەمە جاساپ حابارلايدى.

The Washington Post باسىلىمى ا ق ش ۇكىمەتىنىڭ ەكى وكىلىنىڭ پىكىرىنە جۇگىنەدى. ولاردىڭ ايتۋىنشا، ارنايى بارلاۋ قىزمەتتەرى بىرنەشە كۇننىڭ ىشىندە قۇجاتتى جاريالاۋ ءۇشىن ونىڭ قۇپيا مالىمەتتەرى الىنىپ تاستالعان نۇسقاسىن ازىرلەۋى ءتيىس بولعان.

وكىلدەردىڭ مالىمەتى بويىنشا، باياندامادا اقپاراتتىڭ كوپ بولعانىنا قاراماستان، ۆيرۋستىڭ ناقتى شىعۋ تەگى تۋرالى سوڭعى قورىتىندى جوق. بيلىك وكىلدەرىنىڭ ءبىرى امەريكاندىق بارلاۋ قاۋىمداستىعى «بۇل ماسەلەنى قاراستىرۋ ءۇشىن ارنايى جابدىقتالماعان»، سەبەبى كوروناۆيرۋستىڭ شىعۋ تەگىن انىقتاۋ ءبىرىنشى كەزەكتە بارلاۋشى ەمەس، عالىمداردىڭ قۇزىرەتىندە.

دۇيسەنبى كۇنى اق ءۇيدىڭ باسپا ءسوز حاتشىسى دجەن پساكي كوروناۆيرۋستىڭ شىعۋ تەگى تۋرالى باياندامانىڭ قۇپيا ەمەس نۇسقاسى جۇرتشىلىق نازارىنا بايدەن وقىپ شىققان سوڭ بىرنەشە كۇن وتكەننەن كەيىن ۇسىنىلۋى ءتيىس دەپ مالىمدەدى. ول بۇل نۇسقانىڭ ءدال قانداي ۇلگىدە ۇسىنىلاتىنىن ناقتى ايتا المادى.

بايدەن مامىر سوڭىندا ا ق ش- تىڭ بارلاۋ قىزمەتىنىڭ جاڭا كوروناۆيرۋستىڭ ءدال قانداي جولمەن تارالا باستاعانى تۋرالى سەنىمدى اقپاراتى جوق ەكەنىن مالىمدەدى. ا ق ش پرەزيدەنتى ارنايى قىزمەتتەرگە قولدا بار بارلىق مالىمەتتى زەرتتەۋگە ەكى ەسە كوپ كۇش جۇمساي وتىرىپ، 90 كۇننەن كەيىن جاڭا ەسەپ بەرۋدى تاپسىردى.