الماتىدا كۇزەتشى جۋرناليستى اكىمدىكتەن كوتەرىپ شىعارىپ تاستادى
جۋرناليست اقبوپە تاڭىربەرگەن وقيعانىڭ ۆيدەوسىن الەۋمەتتىك جەلىدە جاريالادى.
«سەن - اكىمدىك پەن حالىق اراسىنداعى كوپىرسىڭ» دەدىڭىزدەر. مەن جەلپىلدەپ، جەتىپ باردىم. اكىمدىك بولسا، سىزدەردىڭ «كوپىرلەرىڭىزدى» دالاعا لاقتىرىپ جىبەردى. ءبىتتى. الماتى قالاسى الاتاۋ اۋدانىنداعى اكىمدىكتەن ماڭگى ەستەلىك»، - دەپ جازدى اقبوپە تاڭىربەرگەن Instagram-داعى پاراقشاسىندا.
الماتى قالاسى الاتاۋ اۋدانى اكىمدىگى جاعدايعا قاتىستى تۇسىنىك بەردى.
«حابار 24» تەلەارناسىنىڭ جۋرناليسى ا. تاڭىربەرگەنمەن بولعان وقيعاعا بايلانىستى الاتاۋ اۋدانىنىڭ اكىمدىگى كەلەسىنى حابارلايدى. قولدانىستاعى كارانتين شەكتەۋلەرىنە بايلانىستى الاتاۋ اۋدانى اكىمدىگىنىڭ عيماراتىنا كىرۋ شەكتەلگەن جانە Ashyq قوسىمشاسى بويىنشا جۇزەگە اسىرىلادى. جۋرناليست ا. تاڭىربەرگەن وپەراتورمەن بىرگە عيماراتقا قوسىمشاداعى ءوز مارتەبەسىن سكانەرلەمەي، تۋرنيكەتتىڭ استىمەن وتكەن، بۇل تۋرالى ءتيىستى بەينەجازبا بار»، - دەپ اتاپ ءوتتى اكىمدىكتەگىلەر.
اكىمدىكتەگىلەردىڭ سوزىنشە، ب ا ق وكىلدەرى كۇزەت قىزمەتى قىزمەتكەرلەرىنىڭ ەسكەرتۋىنە جاۋاپ بەرمەي، جانجالدى شىعارعان. الايدا كۇزەتشى دە جازالانۋى مۇمكىن.
«الاتاۋ اۋدانىنىڭ اكىمدىگى كۇزەت قىزمەتى قىزمەتكەرىنىڭ ارەكەتىن قولايسىز ەكەنىن رەسمي تۇردە مالىمدەيدى. بۇل ارەكەتتەرى ءۇشىن قىزمەتتىك تەرگەۋ جۇمىستارى جۇرگىزىلىپ جاتىر. ناتيجەسى بويىنشا ولاردى جاۋاپقا تارتۋ ماسەلەسى قاراستىرىلادى. سونىمەن قاتار، اكىمدىك ب ا ق وكىلدەرىمەن كونسترۋكتيۆتى نەگىزدە جۇمىس ىستەۋ ءۇشىن اشىق جانە ءوز قۇزىرەتى شەڭبەرىندە قىزىعۋشىلىق تانىتقان اقپاراتقا قول جەتكىزۋگە دايىن ەكەنىن اتاپ وتەدى. اۋدان اكىمى جۋرناليستەرگە سۇحبات بەرۋگە دايىن»، - دەپ حابارلادى الماتى قالاسى الاتاۋ اۋدانىنىڭ اكىمدىگى.
