توكيو پاراليمپياداسىنىڭ سالتاناتتى اشىلۋ ءراسىمى اياقتالدى
ايتا كەتسەك، العاشقى پاراليمپيادا ويىندارى 1960 -جىلى يتاليانىڭ استاناسى ريمدە ءوتتى. ويىندار 18-قىركۇيەكتە «اكۆااتسەتوس» ستاديونىندا اشىلدى. قازاقستاندىق سپورتشىلار 1996 -جىلدان بەرى جازعى پاراليمپيادا ويىندارىنا قاتىسىپ كەلەدى.
بۇعان دەيىن قازاقستان قۇراماسى ساپىنان ەكى سپورتشى جۇلدەگە قول جەتكىزدى. 2016 -جىلى برازيليانىڭ ريو- دە- جانەيرو قالاسىندا زۋلفيا گابيدۋللينا ەركىن مانەردە 100 مەترگە سۋعا جۇزۋدەن چەمپيون اتاندى. سول جولى تاعى ءبىر قازاقستاندىق راۋشان قويشىبايەۆا پاۋەرليفتينگتەن ايەلدەر اراسىندا 67 كەلىدە كۇمىس جۇلدەگەر اتاندى.
ءدۇبىرلى دودا 24-تامىز جانە 5-قىركۇيەك ارالىعىندا وتكىزىلەدى. اتالعان جارىستا ەلىمىزدىڭ اتىنان بارعان 26 سپورتشى سپورتتىڭ 7 تۇرىنەن سىنعا تۇسەدى. ايتا كەتەرلىگى، بيىلعى پاراليمپيادا ويىندارىنا بۋتان، گرەنادا، مالديۆى، پاراگۆاي، سەنت- ۆينسەنت جانە گرەنادينا سەكىلدى مەملەكەت سپورتشىلارى تۇڭعىش رەت قاتىسىپ وتىر.
العاشقىدا اتالعان دوداعا الەمنىڭ 183 ەلىنەن سپورتشىلار قاتىسۋى جوسپارلانعان ەدى. كوروناۆيرۋس ينفەكسياسىنا جۇقتىرىپ الۋ قاۋپىنە بايلانىستى ولاردىڭ 20 سى توكيوعا كەلۋدەن باس تارتتى.
