ەكى اقتوبەلىك تىيىم سالىنعان اۋديوجازبالاردى ساقتاعانى ءۇشىن جازالاندى

اقتوبە. قازاقپارات - اقتوبەدە پوليتسيا قىزمەتكەرلەرى «ۆكونتاكتە» الەۋمەتتىك جەلىسىنە مونيتورينگ جۇرگىزىپ، تىيىم سالىنعان اۋديوجازبالاردى ساقتاعان ەكى اقتوبەلىكتى انىقتادى، دەپ حابارلايدى قازاقپارات ءتىلشىسى.

اقتوبە قالاسىنىڭ 28 جاستاعى ەكى تۇرعىنى دەسترۋكتيۆتى سيپاتتاعى اۋديوجازبانى ساقتاعان. ءدىني ساراپتاما ناتيجەلەرى بويىنشا اۋديوجازبا مازمۇنى قازاقستان رەسپۋبليكاسىنىڭ اۋماعىندا تىيىم سالىنعانى انىقتالدى.

«سوت شەشىمىمەن ەكى اقتوبەلىك ق ر ا ق ب ت ك-نىڭ 453-بابىنىڭ 1-بولىگى بويىنشا اكىمشىلىك جاۋاپقا تارتىلىپ، بۇقارالىق اقپارات قۇرالىندا جاريالانعان ءونىمى تاركىلەنىپ، ءارقايسىسى 58340 تەڭگە مولشەرىندە اكىمشىلىك ايىپپۇل تۇرىندەگى جازاعا تارتىلدى. اقتوبە وبلىسىنىڭ پوليتسيا دەپارتامەنتى قازاقستان رەسپۋبليكاسىنىڭ كونستيتۋتسيالىق قۇرىلىسىن كۇشتەپ وزگەرتۋدى، ونىڭ تۇتاستىعىن بۇزۋدى، مەملەكەت قاۋىپسىزدىگىنە نۇقسان كەلتىرۋدى، سوعىستى، الەۋمەتتىك، ناسىلدىك، ۇلتتىق، ءدىني، تەكتىك-توپتىق جانە رۋلىق ارازدىقتى قوزدىرۋدى، قاتىگەزدىك پەن زورلىق-زومبىلىققا باس ۇرۋدى ناسيحاتتاۋعا نەمەسە ۇگىتتەۋگە باعىتتالعان مالىمەتتەر مەن ماتەريالدارى بار بۇقارالىق اقپارات قۇرالدارىنىڭ ءونىمىن دايىنداۋعا، ساقتاۋعا، اكەلۋگە، تاسىمالداۋعا، تاراتۋعا تىيىم سالىناتىنىن ەسكە سالادى»، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.