قازاقستان كوروناۆيرۋستىڭ تارالۋ دەڭگەيى بويىنشا الەمدىك رەيتينگتە نەشىنشى ورىندا؟

نۇر-سۇلتان. قازاقپارات - ق ر دەنساۋلىق ساقتاۋ ءمينيسترى الەكسەي سوي ۇكىمەت وتىرىسىندا قازاقستاننىڭ كوروناۆيرۋس جۇقتىرۋ دەڭگەيى بويىنشا الەمدىك رەيتينگتە نەشىنشى ورىندا تۇرعانىن ايتتى، دەپ حابارلايدى قازاقپارات ءتىلشىسى.

«الەمدە 213 ميليوننان استام كوروناۆيرۋس ينفەكتسياسىنىڭ جاعدايى تىركەلىپ وتىر. تاۋلىگىنە 480 مىڭنان استام جاعداي تىركەلۋدە، 4,4 ميلليون ادام قايتىس بولدى. دۇنيەجۇزىلىك دەنساۋلىق ساقتاۋ ۇيىمىنىڭ 6 ءوڭىرىنىڭ ىشىندە 4 وڭىردە شىلدەنىڭ ەكىنشى ونكۇندىگىنەن باستاپ اۋرۋ جۇقتىرۋ دەڭگەيى ءوسىپ وتىر. سوڭعى اپتادا ەڭ كوپ اۋرۋ جۇقتىرۋ دەڭگەيى ازەربايجاندا تىركەلدى اپتا ىشىندە اۋرۋ جۇقتىرۋ دەڭگەيى 63 پايىز وسكەن. جاپونيادا 34 پايىز، يزاريلدە 39 پايىز ءوستى. قازاقستاندا ءبىر اپتادا اۋرۋ جۇقتىرۋ دەڭگەيى 7 پايىزعا ءتۇستى»، - دەگەن ۆەدومستۆو باسشىسى قازاقستاندا سوڭعى اپتادا اۋرۋ جۇقتىرۋ كورسەتكىشى 7 پايىزعا تومەندەگەنىن اتادى.

«الەمدىك رەيتينگتە ءبىر ميلليون حالىققا اۋرۋ جۇقتىرۋ جانە ءولىم جاعدايى كورسەتكىشى بويىنشا قازاقستان 222 ەلدىڭ ىشىندە 101- ورىندا تۇر»، - دەدى مينيستر.

ەسكە سالساق، ۇكىمەت وتىرىسىندا پرەمەر-مينيستر اسقار مامين كوروناۆيرۋس ينفەكسياسىنىڭ تارالۋىن بولدىرماۋ جونىندەگى ۆەدومستۆوارالىق كوميسسياعا وڭىرلەردە Ashyq جۇيەسىنە قاتىساتىن بيزنەس سۋبەكتىلەرى ءۇشىن دەمالىس كۇنگى شەكتەۋ شارالارىن جەڭىلدەتۋ ماسەلەسىن قاراستىرۋدى تاپسىردى.

«ۆاكسينانىڭ ءبىرىنشى كومپونەنتىن العانداردىڭ سانى 6,5 ميلليون ادامعا جۋىق، ال ەكىنشى كومپونەنتىن 5 ميلليوننان استام ادام سالدىردى. ۆاكسينا سالدىرۋ ناۋقانىن ودان ءارى كۇشەيتۋ قاجەت. ۆەدومستۆوارالىق كوميسسياعا ەپيدەميولوگيالىق جاعداي تۇراقتالىپ جاتقان وڭىرلەردەگى Ashyq جۇيەسىنە قاتىساتىن بيزنەس سۋبەكتىلەرى ءۇشىن دەمالىس كۇنگى شەكتەۋ شارالارىن جەڭىلدەتۋ ماسەلەسىن قاراستىرۋدى تاپسىرامىن»، - دەگەن پرەمەر-مينيستر بۇل جۇمىستاعى جالپى باقىلاۋدى ورىنباسارى ەرالى توعجانوۆقا تاپسىردى.