سەمەيدە ءاليحان بوكەيحان بەينەلەگەن مۋرال پايدا بولدى
قازاق يننوۆاتسيالىق گۋمانيتارلىق- زاڭ ۋنيۆەرسيتەتىنىڭ باستاماسىمەن سەمەي قالاسىندا الاش كوسەمى ءاليحان بوكەيحان بەينەلەگەن مۋرال پايدا بولدى. بۇل ەل تاۋەلسىزدىگىنىڭ 30 جىلدىعى جانە ءاليحان بوكەيحاننىڭ 155 جىلدىعى اياسىندا جۇزەگە اسىپ وتىر.
«الاش قايراتكەرىنىڭ بەينەسى قالاداعى كوپقاباتتى ۇيلەردىڭ بىرىنە كوركەم مۋرال تۇرىندە سالىندى. ءۇش اي دايىندىقتان سوڭ جۇمىس ەكى جۇماعا سوزىلعان. سونىمەن قاتار ۋنيۆەرسيتەت ءوز ەسەبىنەن سول كوپقاباتتى ءۇيدىڭ اينالاسىنا جوندەۋ، اباتتاندىرۋ، اۋلاسى مەن كىرەبەرىستى جارىقتاندىرۋ جۇمىستارىن جۇرگىزدى»، - دەيدى ءبىلىم ورداسىنىڭ رەكتورى شىرىن قۇرمانبايەۆا.
ايتا كەتەيىك، مۋرال شاكارىم داڭعىلى، 15 مەكەنجايى بويىنشا ورنالاسقان كوپقاباتتى تۇرعىن ءۇيدىڭ قابىرعاسىنا سالىنعان. ونىڭ اۆتورى - كاسىبي سۋرەتشى الەكساندر رومانوۆ.
