مۇحتار تايجان: بەيبىت جينالىستار تۋرالى زاڭ جوباسى - ەلدەگى دەموكراتيانىڭ كورسەتكىشى

الماتى. قازاقپارات - بەيبىت جينالىستار تۋرالى قابىلدانعان زاڭ ءوزىنىڭ تيىمدىلىگىن كورسەتتى. قوعام قايراتكەرى مۇحتار تايجان وسىلاي پىكىر ءبىلدىردى، دەپ حابارلايدى قازاقپارات ءتىلشىسى.

ونىڭ ايتۋىنشا، ميتينگىلەر ەلدەگى دەموكراتيانىڭ كورسەتكىشى.

«ەلگە ميتينگىلەر قاجەت. كورىپ وتىرعانىمىزداي، ميتينگىلەر شەت ەلدەردە كۇن سايىن وتەدى، ءبىز دە وعان ۇيرەنۋىمىز كەرەك. ءار عىلىمي تەوريانىڭ تەتىگى - ول پراكتيكا. ارىپتەستەرىم كەلتىرگەن ستاتيستيكا مەن مىسالدارعا سۇيەنسەك، قازىر وعان دەگەن كوزقاراس وزگەرگەن. بەيبىت جينالىستاردى وتكىزۋگە ارنالعان جاڭا زاڭ ءوزىنىڭ تيىمدىلىگىن كورسەتتى. ءبىز ءۇشىن بۇل زاڭ پروگرەسسيۆتى بولدى»، - دەدى ساراپشى.

ەسكە سالايىق، بۇگىن الماتىدا تانىمال ساراپشىلار بەيبىت جينالىستار تۋرالى زاڭنىڭ ناتيجەسىن تالقىلادى. شاراعا بەلگىلى قازاقستاندىق ساراپشىلار، قۇقىق قورعاۋشىلار، ۇلتتىق قوعامدىق سەنىم كەڭەسىنىڭ مۇشەلەرى مەن قازاقستان رەسپۋبليكاسى پرەزيدەنتىنىڭ كومەكشىسى، ۇلتتىق كەڭەستىڭ حاتشىسى ەرلان قارين قاتىستى.

باياندامادا جاڭا زاڭنىڭ قولدانىلۋى ازاماتتارعا وزدەرىنىڭ ازاماتتىق پوزيتسياسىن كورسەتۋگە كەڭ مۇمكىندىكتەر بەرەتىندىگىنە نازار اۋدارىلادى.

سونىمەن قاتار، زاڭ نورمالارى بويىنشا جاڭا ورىنداردا، قالالاردىڭ ورتالىقتارىندا بەيبىت جينالىستار وتكىزۋ تۇرعىن حالىقتىڭ كوپ جينالۋىنا، بۇقارالىق اقپارات قۇرالدارىندا جان- جاقتى جاريا ەتۋگە جول اشتى.