ەۋرازيالىق وداق وكىلى ادام قۇقىعىن ساقتاۋعا شاقىرادى

نۇر-سۇلتان.قازاقپارات -قازاقستانعا تاياۋدا ساپارمەن كەلگەن ەۋرازيالىق وداقتىڭ ورتالىق ازيا بويىنشا ارناۋلى وكىلى تەري حاكالا بۇگىن ەلىمىزدىڭ سىرتقى ىستەر مينيسترلىگىندە كەلىسسوز وتكىزدى، دەپ حابارلايدى «حابار 24».

تىلشىلەرىمىزگە بەرگەن سۇحباتىندا ول قازاقستان مەن ەۋرووداق اراسىنداعى ارىپتەستىك پەن ىنتىماقتاستىققا وڭ باعا بەرىپ، تاراپتاردىڭ بىرلەسە قولعا العان بارلىق ماسەلەسى ناتيجەلى ىسكە اسىپ جاتقانىن ايتتى.

سونداي- اق تەري حاكالا 2019 -جىلى ماقۇلداعان ەۋرووداقتىڭ ورتالىق ازيا بويىنشا ستراتەگياسىنىڭ دامۋ تۇستارى دا جان- جاقتى تالقىلانعانىن تىلگە تيەك ەتتى. سونىمەن قاتار اۋعانستانداعى قازىرگى جاعداي دا نازاردان تىس قالمادى. تەري حاكالانىڭ ايتۋىنشا، ەۋروپالىق وداق اۋعانستانداعى احۋالعا الاڭداۋشىلىق ءبىلدىرىپ، ايماقتا حالىقارالىق زاڭعا سايكەس ادام قۇقىعىنىڭ ساقتالۋىن تالاپ ەتەدى.

تەري حاكالا، ەو ورتالىق ازيا بويىنشا ارناۋلى وكىلى:

- ەۋرووداق پەن قازاقستان اراسىنداعى ىنتىماقتاستىق بەلسەندى تۇردە دامىپ كەلەدى. قابىلدانعان ەكىجاقتى شارتتار ءتيىستى دەڭگەيدە جۇزەگە اسىرىلىپ، 2019 -جىلى ماقۇلداعان ەۋرووداقتىڭ ورتالىق ازيا بويىنشا ستراتەگياسىنىڭ دامۋ تۇستارى دا ءساتتى ىسكە اسىرىلۋدا. جەرگىلىكتى بيلىكپەن كەزدەسۋ بارىسىندا ادام قۇقىعى، ازاماتتىق قوعامنىڭ قالىپتاسۋى جانە دامۋى دا جان- جاقتى تالقىلاندى.

اۋعانستانداعى جاعدايعا كەلسەك، ەۋرووداق ەلدەرى اۋعان جەرىندەگى ءوز ازاماتتارىن ەلگە قايتارۋ ماسەلەسىن ءالى دە شەشىپ جاتىر. ءبىز اۋعانستاندا ادام قۇقىعىنىڭ ساقتالۋىن قالايمىز.