مينيسترلىك سىنىپ وقۋشىلارىن كارانتينگە جىبەرۋ الگوريتمىن ءتۇسىندىردى

نۇر- سۇلتان. قازاقپارات – ق ر د س م سانيتارلىق- ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا سىنىپ وقۋشىلارىن كارانتينگە جىبەرۋ الگوريتمىن ءتۇسىندىردى، دەپ حابارلايدى قازاقپارات ءتىلشىسى.

«مەكتەپتەر مەن سىنىپتاردى كارانتينگە جىبەرۋ قاعيداسى باس مەملەكەتتىك سانيتار دارىگەرىنىڭ قاۋلىسىمەن بەكىتىلەدى. ول ەرەجە بارشا ەل بويىنشا ءبىرىڭعاي بولادى. سىنىپتارعا توقتالساق، ءار سىنىپ ءبىر كابينەتتە وتىرادى. وسى ورايدا بالالار ۇزاق ۋاقىت بويى ءبىر كابينەتتە وتىرعاندىقتان، ولارعا قاتىستى «جاقىن كونتاكت» تۇسىنىگى بەرىلەدى»، - دەدى ا. ەسماعامبەتوۆ ورتالىق كوممۋنيكاتسيالار قىزمەتىندە.

وسى ورايدا ول «جاقىن كونتاكت» نەنى بىلدىرەتىنىن ءتۇسىندىردى.

«جاقىن كونتاكت - ول سىنىپتا بايلانىستا بولعان بارشا ادامدى بىلدىرەدى، ياعني ءبىر بالا ىندەت جۇقتىرسا، وندا سىنىپتاعى وقۋشىلاردىڭ بارلىعى 14 كۇنگە كارانتينگە كەتەدى»، - دەدى ول.

ونىڭ سوزىنە قاراعاندا، مەكتەپتەردى جابۋدىڭ قادامدارى دا پىسىقتالىپ جاتىر.

«بىزدە تۇماۋ بويىنشا ءتيىستى تاجىريبە بار. ەگەر مەكتەپتىڭ 20 پايىزى ونى جۇقتىرسا، وندا وقۋ ورنى كارانتينگە شىعادى. قازىرگى كەزدە وسى قادامداردى پايدالانۋعا تىرىسىپ وتىرمىز. سىنىپتا كوروناۆيرۋستىڭ ءبىر جاعدايى تىركەلسە، وندا سىنىپتاعى بارلىق بالا كارانتيندە بولادى»، - دەدى ول.