س ءى م وكىلى تالىپتەرمەن ديپلوماتيالىق بايلانىس ورناتۋ مۇمكىندىگى تۋرالى پىكىر ءبىلدىردى
«تاليباندى ءبىز مويىنداعان جوقپىز. كەشە سىرتقى ىستەر مينيسترلىگى اۋعانستانداعى احۋالعا بايلانىستى رەسمي مالىمدەمە جاساعانىن بىلەسىزدەر. وتاندىق اقپارات قۇرالدارىندا ول جاريالاندى. ءبىز بۇل ەلدەگى احۋالدى مۇقيات باقىلاپ وتىرمىز. ب ۇ ۇ- نىڭ قاۋىپسىزدىك كەڭەسىنىڭ ينكليۋزۆيتى جانە پرەزەنتاتيۆتى ۇكىمەت قۇرۋ، از ۇلتتار مەن ايەلدەردىڭ قۇقىن قۇرمەتتەۋ، باسقا مەملەكەتتەرگە قاۋىپ توندىرەتىن توپتاردىڭ بولۋىنا جول بەرمەۋ، حالىقارالىق زاڭنامانى ساقتاۋ تۋرالى مالىمدەمەسىن قولدايمىز. بۇل ەرەجەلەردى ورىنداۋ اۋعانستاننىڭ جاڭا ۇكىمەتىمەن جاسالاتىن كەلىسسوزدەردىڭ باستاۋى بولۋى كەرەك»، - دەگەن ءمينيستردىڭ ورىنباسارى كوپ جىلدىق تاجىريبە اۋعانستاندىقتاردا بەيبىت پروتسەس جۇرگىزۋدىڭ باسقا بالاماسى جوق ەكەنىن كورسەتكەنىن اتادى.
«بۇل پروتسەسكە بالاما جوق. ەل ازاماتتارىنا ەلدىڭ مەملەكەتتىك- قوعامدىق قۇرىلىمىن الەۋمەتتىك- ساياسي احۋالعا قاراي ءوز بەتىمەن تاڭداۋ كەرەك بولىپ تۇر. قانداي دا ءبىر ەلدەر تاليبانمەن ديپلوماتيالىق قارىم- قاتىناس ورناتتى دەۋ اسىعىس. قازىر ءبارى تاليباننىڭ ارەكەتتەرى وزدەرى جاساعان مالىمدەمەگە قانشالىقتى ساي بولادى جانە بۇل تاراپتىڭ كەلىسسوزگە قانشالىقتى يكەمدى ەكەنىن باقىلاپ وتىر. تاليبان قازىر كابۋلدا. بۇل بۇگىنگى كۇننىڭ شىندىعى. بىزگە وسى شىندىقپەن جۇمىس ىستەپ، بۇل ەلمەن ءارى قاراي ارىپتەستىك جۇرگىزۋىمىز كەرەك. بايلانىس دەگەنگە كەلسەك، ناقتى دەڭگەيدە بايلانىسىمىز بولعان جوق»، - دەدى اقان راحمەتۋللين.
سونداي- اق، ول كابۋلداعى قازاقستان ەلشىلىگىنىڭ قازىرگى احۋالىنا توقتالدى.
«ەلشىلىكتىڭ اقپاراتى بويىنشا، تاليباندىقتار كابۋلعا كىرگەن كەزدە ءبىر بولىگى ءبىزدىڭ ەلشىلىك ورنالاسقان اۋماقتى باسىپ العان. بۇل كەزدە پوليتسيا كابۋلدى تاستاپ شىققان بولاتىن. ءبىزدىڭ ەلشى سىرتقا شىعىپ، تاليبان وكىلدەرىمەن سويلەسكەن. ولار ەلشىدەن كىم ەكەنىن سۇراعان. ول بۇل مەكەمە قازاقستان ەلشىلىگى ەكەنىن ايتقان. «ەشتەڭەدەن قورىقپاڭىزدار. بۇرىن قالاي جۇمىس ىستەسەڭىزدەر، سولاي جۇمىس ىستەي بەرىڭىزدەر. سىزدەر ءبىزدىڭ كۇزەتىمىزدەسىزدەر»، - دەگەن ەكەن. سودان بەرى ءبىزدىڭ ەلشىلىك سولاردىڭ كۇزەتىندە. ازىرگە بايلانىس وسىنداي دەڭگەيدە عانا»، - دەدى سىرتقى ىستەر ءمينيسترىنىڭ ورىنباسارى.
اۆتور: ەسىمجان ناقتىباي
