قازاقستاندا وقيتىن اۋعانستاندىق ستۋدەنتتەر شەكارادان قاشان وتە الادى
بۇل تۋرالى ق ر سىرتقى ىستەر مينيسترلىگى حالىقارالىق اقپارات كوميتەتى ءتوراعاسىنىڭ ورىنباسارى - باسپا ءسوز حاتشىسى ايبەك سمادياروۆ ايتتى، دەپ حابارلايدى قازاقپارات ءتىلشىسى.
قازاقستاندا وقىپ كەتكەن اۋعانستان ازاماتتارىنان ەلگە كەلۋ تۋرالى وتىنىشتەر ءتۇستى مە؟ تۇسكەن بولسا ولاردى كىرگىزۋ مۇمكىندىگى بار ما؟ ورتالىق كوممۋنيكاتسيالار قىزمەتىندە وتكەن بريفينگىدە ب ا ق وكىلدەرى ق ر سىرتقى ىستەر ءمينيسترىنىڭ ورىنباسارى اقان راحمەتۋللينگە وسىنداي ساۋال قويدى.
«قازاقستاننىڭ سىرتقى ىستەر مينيسترلىگىنە اۋعانستاننىڭ بىزدە وقىپ كەتكەن بۇرىنعى ستۋدەنتتەرى جۇگىنگەن جوق. ەگەر جۇگىنىپ جاتسا، ءار ادام بويىنشا جەكە تارتىپپپەن شەشىم شىعارىلادى. ءدال قازىر ول ماسەلە تۋرالى ەشتەڭە ايتا المايمىز، ياعني ەشكىم جۇگىنگەن جوق»، - دەدى ءمينيستردىڭ ورىنباسارى.
ال ايبەك سمادياروۆتىڭ ايتۋىنشا، قازاقستاندا قازىر ءبىلىم الىپ جاتقان ستۋدەنتتەردەن وقۋىن ءارى قاراي جالعاستىرۋ تۋرالى وتىنىشتەر ءتۇسىپ جاتقان كورىنەدى.
«قازاقستاندا قازىر وقىپ جاتقان ستۋدەنتتەردىڭ اراسىندا جازعى دەمالىس كەزىندە ەلىنە كەتكەندەر بار. ولار تۋرالى مالىمەتتەر ءتۇسىپ جاتىر بىزگە. وقۋلارىن وسىنداي جالعاستىرعىسى كەلەتىندەرى بار. ءبىز بۇل ماسەلەنى باقىلاۋدا ۇستاپ وتىرمىز. اۋعانستانداعى جاعداي تۇراقتانعان كەزدە ءبىزدىڭ ەلشىلىك مىندەتتى تۇردە ولارعا ءتيىستى ۆيزا بەرەدى. ەكى ارادا اۋە نەمەسە باسقا كولىك قاتىناسى قالىپقا كەلگەن سوڭ قازاقستانداعى وقۋلارىن الاڭسىز جالعاستىرا الادى»، - دەدى ايبەك سمادياروۆ.
اۆتور: ەسىمجان ناقتىباي
