التىنشاش كوبجەتەروۆا: ۆاكسينا تيىمدىلىگىنىڭ دالەلى - بۇل ايماقتاعى ينفەكسيانىڭ تومەن كورسەتكىشى

كوكشەتاۋ. قازاقپارات - اقمولا وبلىسىنىڭ ەگىندىكول اۋدانىندا وسى جىلدىڭ ناۋرىز ايىندا باستالعان حالىقتى جاپپاي يممۋنداۋ جۇمىستارى اياقتالدى. ەگۋ ناۋقانى باستالعاننان بەرى توعىز ەگۋ پۋنكتى تارتىلىپ، كوشپەلى توپتار بەلسەندى جۇمىس جۇرگىزدى.

سانيتارلىق قىزمەتتەردىڭ جانە جەرگىلىكتى اكىمدىك جۇمىسىنىڭ بەلسەندىلىگى حالىقتى تولىق يممۋنداۋعا ىقپال ەتتى، دەپ حابارلايدى قازاقپارات ءتىلشىسى وبلىستىق ىشكى ساياسات باسقارمىسىنا سىلتەمە جاساپ.

ءبىرىنشى بولىپ مەديتسينا قىزمەتكەرلەرى، پەداگوگتار، قۇقىق قورعاۋ ورگاندارىنىڭ قىزمەتكەرلەرىنە ەكپە سالىندى. سودان كەيىن ۆاكسينانى مەملەكەتتىك قىزمەتكەرلەر، اۋىل شارۋاشىلىعى قۇرىلىمدارىنىڭ قىزمەتكەرلەرى، كاسىپكەرلەر مەن ستۋدەنتتەر الدى. اۋدان اكىمىنىڭ ورىنباسارى التىنشاش كوبجەتەروۆانىڭ ايتۋىنشا، الدىمەن حالىقتى ۇيىمداستىرۋ جانە شاقىرۋ وتە قيىن بولدى. «مەن ءوزىم اۋىلدارعا بارىپ، ءاربىر تۇرعىنمەن اڭگىمەلەسىپ وتىردىم. ناقتى مىسالدارمەن ءتۇسىندىرىلدى. ەگىندىكولدە وتباسى شەتەلدەن كەلىپ، اۋىرعاندا، سونداي- اق، وزگە ەلدى مەكەندەرگە بارىپ، جەرلەۋ راسىمىنە قاتىسقان كەزدە ىندەت تاراعان جاعدايلار بولدى. ۆاكسينانىڭ تيىمدىلىگىنىڭ دالەلى- بۇل ايماقتاعى ينفەكسيانىڭ تومەن كورسەتكىشتەرىنىڭ ءبىرى»، - دەيدى اۋدان اكىمىنىڭ ورىنباسارى.

ول اتاپ وتكەندەي، ۆاكسيناتسيالاۋ جالعاسۋدا. ۋاقىتشا مەديتسينالىق سەبەپتەرى بار نەمەسە بۇرىن اۋىرىپ جازىلعاندار ءوز ەرىكتەرىمەن ۆاكسينا الۋدا. ەندىگى ارادا دارىگەرلەردىڭ كۇش- جىگەرى اۋرۋدىڭ الدىن- الۋعا جانە جەكە قاۋىپسىزدىكتىڭ قوسىمشا شارالارىنا باعىتتالىپ وتىر. وسى رەتتە، وبلىستىڭ قوسشى قالاسى، جارقايىڭ جانە قورعالجىن اۋداندارىندا ۆاكسيناتسيا ناۋقانى اياقتالۋعا جاقىن. ايتا كەتەيىك، اقپان ايىنان باستاپ وبلىستا 246 مىڭعا جۋىق ادام ۆاكسينانىڭ ءبىرىنشى كومپونەنتىن السا، 191 مىڭنان استام ادامعا ەكىنشى كومپونەنتى سالىندى. وبلىستا 133 ەگۋ پۋنكتى، سونداي-اق، 135 موبيلدى بريگادا جۇمىس ىستەيدى.

اۆتور: اسلان وسپانوۆ