اۋعانستان پرەزيدەنتى قانشا اقشا ۇرلاپ كەتكەنى انىقتالدى
بۇل تۋرالى اۋعانستاننىڭ تاجىكستانداعى ەلشىسى مۇحاممەد زوحير اگبار سارسەنبىدە دۋشانبەدە وتكەن باسپا ءسوز ءماسليحاتىندا مالىمدەدى، - دەپ حابارلايدى Tengrinews.kz ءتىلشىسى «روسسيا-24» ارناسىنا سىلتەمە جاساپ.
ول پرەزيدەنت عانيدىڭ قاشۋىن «مەملەكەت پەن ۇلتقا جاسالعان وپاسىزدىق» دەپ اتادى. اگبار ينتەرپولعا اشراف عانيدى حالىقارالىق سوتقا جەتكىزۋ ءۇشىن قاماۋعا الۋ تۋرالى وتىنىشپەن جۇگىنەتىنىن ايتتى.
سونىمەن قاتار، ەلشى ۆيتسە-پرەمەر امرۋللا سالەحتى اۋعانستان باسشىسى رەتىندە مويىندايتىنىن اتاپ ءوتتى.
«ەل كونستيتۋتسياسىنا سايكەس، پرەزيدەنت بولماعان، قاشىپ كەتكەن نەمەسە قايتىس بولعان جاعدايدا، ءبىرىنشى ورىنباسارى ونىڭ مىندەتتەرىن اتقارادى، سوندىقتان امرۋللا سالەح قازىر مەملەكەت باسشىسى»، - دەدى ەلشى، ونىڭ سوزدەرى ديپلوماتيالىق ميسسيانىڭ Facebook پاراقشاسىندا كەلتىرىلگەن.
ۆيتسە-پرەمەر امرۋللا سالەح «تاليبان» كەلگەننەن كەيىن ەلدە قالدى. سالەحتىڭ جاقتاستارى سانالاتىن اسكەري قىزمەتكەرلەر مەن سودىرلار اراسىندا قاقتىعىستار جالعاسىپ جاتىر.
بۇعان دەيىن اشراف عاني كابۋلدان اقشا تولتىرىلعان تىكۇشاقپەن قاشىپ كەتكەنى حابارلانعان. قولما-قول اقشا اۋەجايعا ءتورت اۆتوموبيلمەن جەتكىزىلگەن. ءبىراق تىكۇشاققا ءبارى بىردەي سىيماي قالعان، اقشانىڭ ءبىر بولىگى ۇشۋ الاڭىندا قالدى.
يراننىڭ YJC اگەنتتىگى سارسەنبىدە تاراتقان اقپاراتقا سايكەس، قازىرگى ۋاقىتتا اشراف عاني ب ا ءا استاناسى ءابۋ-دابيدەگى اۋرۋحانادا جاتىر، ونىڭ جاعدايى ناشارلاعان.
