اللەرگياسى بارلارعا ۆاكسينا سالدىرۋعا بولا ما
وسكەمەن. قازاقپارات - قازاقستاندا كوروناۆيرۋس پاندەمياسىمەن كۇرەس جونىندەگى «ەل ءۇشىن ەگىلەمىن» ازاماتتىق شتابىنىڭ مۇشەسى، اللەرگولوگ رافاەل روزەنسون جاۋاپ بەردى، دەپ حابارلايدى قازاقپارات ءتىلشىسى.
«قانداي ساناتتاعى ازاماتتارعا ەكپە الۋعا بولمايتىندىعى تۋرالى سان مارتە رەت ايتىلدى.
ءبىراق «ەگەر ۆاكسينانىڭ ءبىرىنشى كومپونەنتىن العان ادامدا اللەرگيا بايقالسا، وعان ەكىنشىسى سالىنا ما؟» دەگەن ساۋال كوپشىلىكتى مازالاپ ءجۇر. بۇنداي جاعداي وتە سيرەك بولادى. ءبىراق مەنىڭ تاجىريبەمدە كەزدەستى.
ماسەلەن، «سپۋتنيك V» ەكپەسىنىڭ ءبىرىنشى كومپونەنتىن العان ايەلدە اللەرگيالىق رەاكسيا بايقالعان. ەندى وعان ەكىنشىسى سالىنبايدى. قازىر ءبىز ايەلگە قۇرامى جاعىنان قارسى كورسەتىلىمدەرى جوق ۆاكسينانى تاڭداپ جاتىرمىز»، - دەيدى رافاەل روزەنسون.
ونىڭ ايتۋىنشا، ۆاكسينا الماس بۇرىن اللەرگيالىق اسقىنۋدى ەمدەپ العان ءجون. بۇل كوبىنەسە ماۋسىمدىق اللەرگيالارعا قاتىستى.
«جاز شىعىپ، اينالا جاسىل جەلەككە ورانعاندا ەل اراسىندا «پوللينوز» دەپ اتالاتىن اللەرگيا ۋشىعادى. ەندى ونىڭ اياقتالۋىنا دا كوپ قالعان جوق. سودان كەيىن ەش قورىقپاي ۆاكسينا الا بەرۋگە بولادى»، - دەدى اللەرگولوگ.
«ەل ءۇشىن ەگىلەمىن» ازاماتتىق شتابىنىڭ مۇشەسى ءوز سوزىندە قازىرگى ۋاقىتتا ەلىمىزدە كوروناۆيرۋس جۇقتىرۋ كورسەتكىشى كۇرت ءوسىپ كەتكەندىكتەن تۇرعىنداردى كارانتين شارالارىن بۇزباۋعا جانە ىندەتتەن قورعانۋعا مۇمكىندىك بەرەتىن جالعىز امال - ۆاكسينا الۋعا شاقىردى.
