ۇجىمدىق يممۋنيتەتتى قالىپتاستىرۋعا تەك ۆاكسينا كومەكتەسەدى - دارىگەر

الماتى. قازاقپارات- قازاقستاندى عانا ەمەس، بۇكىل الەمدى باسىپ العان كوروناۆيرۋس پاندەمياسىن جەڭۋ ءۇشىن حالىق ۆاكسينالانۋ پروتسەسىنەن ءوتۋى ءتيىس.

مۇنداي پىكىردى الماتىداعى №36-قالالىق ەمحانانىڭ باس دارىگەرى گۇلجاينات تىلەگەن ءبىلدىردى، دەپ حابارلايدى قازاقپارات ءتىلشىسى.

«حالىقتىڭ باسىم بولىگى ۆاكسينا المايىنشا، ءبىز ىندەتتى جەڭۋگە كومەكتەسەتىن ۇجىمدىق يممۋنيتەتكە قولجەتكىزە المايمىز. كوروناۆيرۋسقا قارسى ۆاكسينا ءبىزدىڭ دەنساۋلىعىمىزدى، جاقىندارىمىزدىڭ دەنساۋلىعىن ساقتاۋعا جانە ادامداردى قالىپتى ءومىر سالتىنا قايتارۋ ءۇشىن جاسالعان»، - دەدى گۇلجاينات تىلەگەن.

دارىگەردىڭ ايتۋىنشا، ۆاكسينا الماعان ناۋقاستىڭ جاعدايى اۋىر بولادى، كەيىن اعزا ناشارلايدى، ينفەكسيا تاسىمالداۋشىسىنا اينالىپ ءتىپتى قايعىلى جاعدايعا دۋشار بولۋى مۇمكىن.

«ادامدار ك ۆ ي- گە قارسى ۆاكسيناتسيادان كەيىن اۋىرىپ قالعان جەكەلەگەن جاعدايلار بار. ءبىراق ەگەر ادام ۆيرۋسقا قارسى يممۋنيتەتكە يە بولسا، يممۋنيتەت ۆيرۋستى ولتىرەدى. اۋرۋدان %100 قورعاي الاتىن بىردە- ءبىر ۆاكسينا جوق. دەگەنمەن، COVID-19 ۆاكسيناسى قورعانۋدىڭ ءتيىمدى ءادىسى. ويتكەنى، ۆاكسينالانعان پاتسيەنتتەردىڭ اۋرۋى جەڭىل ءارى سيمپتومسىز بولادى. دەرت اسقىنبايدى، قايعىلى جاعداي بولمايدى»، - دەيدى ول.

باس دارىگەر ۆاكسينالانعان ادامداردىڭ اۋرۋعا شالدىعۋىنىڭ سەبەپتەرىنىڭ ءبىرى ۆاكسيناتسيادان كەيىنگى كەزەڭ دەپ سانايدى، ويتكەنى ەكىنشى كومپونەنت ەنگىزىلگەننەن كەيىن يممۋنيتەتتى قالىپتاستىرۋ ءۇشىن ورتاشا ەسەپپەن 3 اپتا ءۇزىلىس قاجەت. سونىمەن قاتار، كوروناۆيرۋس ينفەكسياسىنىڭ الدىن الۋ شارالارىن ساقتاۋ ماڭىزدى ءرول اتقارادى.

«كوپتەگەن ناۋقاس ۆاكسينانى العاننان كەيىن كوروناۆيرۋس ينفەكسياسىنا قارسى بارلىق قاۋىپسىزدىك شارالارىن تولىق ورىنداۋدان باس تارتادى. يممۋنيتەتتى تەك ۆاكسينا عانا ەمەس، ءومىر سالتى، دۇرىس تاماقتانۋ، ۇيقى قالىپتاستىراتىنىن ايتقىم كەلەدى. سوندىقتان ءبىز بارلىق ناۋقاستاردى ۆاكسينا الۋعا جانە مەديتسينالىق قىزمەتكەرلەردىڭ بارلىق ۇسىنىستارىن ورىنداۋعا شاقىرامىز - ادامدار كوپ جينالاتىن جەرلەردەن اۋلاق بولىپ، بەتپەردە تاعۋ قاجەت»، - دەدى گۇلجاينات تىلەگەن.