اتىراۋدا قازاقستان تۋىن كولىگىنە جاپقان جۇرگىزۋشى جازالاندى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بۇل دەرەك 16- تامىزدا جەدەل باسقارۋ ورتالىعىنىڭ بەينەباقىلاۋ كامەراسىنا ءتۇسىپ قالعان.
«اتىراۋ قالاسىنداعى ش. ەركىنوۆ- ت. اماندوسوۆ كوشەلەرىنىڭ قيىلىسىندا قازاقستان رەسپۋبليكاسىنىڭ مەملەكەتتىك تۋىن جاۋىپ كەلە جاتقان Kia Rio اۆتوكولىگىن بەينەباقىلاۋ كامەراسىنا ءتۇستى. پوليتسيا باسقارماسىنىڭ پاترۋلدىك پوليتسيا باتالونىنىڭ قىزمەتكەرلەرى اتالعان اۆتوكولىكتى باسقارعان 33 جاستاعى جۇرگىزۋشىنى انىقتادى. جۇرگىزۋشى قازاقستان رەسپۋبليكاسىنىڭ مەملەكەتتىك رامىزدەرىن پايدالانۋ ەرەجەسىن بۇزعان» - دەپ حابارلادى دەپارتامەنتتىڭ باسپا ءسوز قىزمەتى.
ق ر اكىمشىلىك قۇقىق بۇزۋشىلىق تۋرالى كودەكسىنىڭ 458-بابى 1-بولىمىنە سايكەس اكىمشىلىك جاۋاپكەرشىلىككە تارتىلىپ، قىسقارتىلعان تارتىپپەن 72925 تەڭگە كولەمىندە ايىپپۇل سالىندى.
ەسكە سالا كەتەلىك، مامىر ايىندا تۋدى كولىگىنە جاۋىپ العان جۇرگىزۋشى جازالانعان بولاتىن.