شىعىس قازاقستاندا شەكارالىق اۋدانداردى دامىتۋ باعدارلاماسى قالاي ىسكە اسىپ جاتىر

وسكەمەن. قازاقپارات - شىعىس قازاقستان وبلىسىنىڭ اكىمى دانيال احمەتوۆ شەكارا ماڭىنداعى ەلدى مەكەندەردى دامىتۋ باعدارلاماسىنا كىرەتىن تارباعاتاي اۋدانى اكىمىنىڭ ەسەبىن تىڭدادى، دەپ حابارلايدى قازاقپارات ءتىلشىسى.

بۇگىندە شىعىس قازاقستان وسىنداي باعدارلاما قابىلداعان ەلىمىزدەگى جالعىز وبلىس. وعان وڭىردەگى بۇرىنعى اۋدان ورتالىقتارى دا ەنىپ وتىر.

«باعدارلامانىڭ ىسكە اسىرىلۋىنا جاۋاپتى بارلىق باسقارما باسشىلارىنا ەسكەرتۋ جاسادىم. ويتكەنى، ولاردىڭ ماماندارى اۋىلداردى ءجيى ارالامايدى. ماسەلەن، تارباعاتاي اۋدانىندا اۋىل شارۋاشىلىعى تەحنيكاسىن جەتكىزۋ، بورداقىلاۋ الاڭدارىنىڭ جۇمىسى جانە ەليتالىق مال باسىن كوبەيتۋ ماسەلەلەرىن شەشۋ قاجەت. اۋىل شارۋاشىلىعى باسقارماسى اگروونەركاسىپ كەشەنى باعدارلامالارىنىڭ ورىندالۋ بارىسىن قاداعالاۋى شارت»، - دەدى دانيال احمەتوۆ.

ونىڭ ايتۋىنشا، شەكارالىق اۋدانداردى دامىتۋعا سەلقوس قاراۋعا بولمايدى. وبلىس اكىمى اتالعان باسقارما باسشىسىنا 10 كۇن ىشىندە كۇرشىم، تارباعاتاي، كاتونقاراعاي جانە باسقا دا اۋدانداردا جوبالاردىڭ ىسكە اسىرىلۋى تۋرالى ەسەپ دايىنداۋدى تاپسىردى.

تارباعاتاي اۋدانىنىڭ اكىمى اسحات سمايلوۆتىڭ مالىمەتىنشە، اقسۋات اۋىلىندا بيىل سۋ قۇبىرىنىڭ قۇرىلىسى اياقتالىپ، اقجار اۋىلىندا فۋتبول الاڭى سالىنادى. سونداي- اق ءۇش اۋىلدا ەنەرگيا ۇنەمدەيتىن شامدار ورناتىلىپ، جولدارعا ورتاشا جوندەۋ جۇمىستارى جۇرگىزىلمەك.