اۋعانستاننىڭ بۇرىنعى ۆيتسە- پرەزيدەنتى امرۋللا سالەح تاليبانعا قارسى سوعىس اشتى
ءوزىن مەملەكەت باسشىسى دەپ جاريالاعان سالەح قازىر اسكەر جيناۋدا. كەيبىر دەرەك كوزدەرى بويىنشا پاندجشەر ايماعىنا 10 مىڭ جاساق كەلە جاتىر. وسى ارالىقتا كابۋلدا تاليبان وكىلدەرى ەل استاناسىن باسىپ العاننان كەيىن العاش رەت رەسمي باسپا ءسوز ءماسليحاتىن وتكىزدى.
زابيحۋللا مۋدجاحيدا، تاليبان رەسمي وكىلى:
- ءبىز تاريحي كەزەڭدە تۇرمىز. بۇعان ەش كۇمان جوق. قازىر جاڭا ۇكىمەت قۇرىلىپ جاتىر. ءبىز ءارتۇرلى ساياسي كۇشتەردىڭ كوشباسشىلارىمەن كەزدەسىپ، ورتاق مامىلەگە كەلەمىز. ۇكىمەت جۇمىسى شاريعاتقا نەگىزدەلمەك. بىزگە ىشكى دە، سىرتقى دا جاۋلار كەرەك ەمەس. ا ق ش جانە باسقا وداقتاستارعا قىزمەت ەتكەن بارلىق ادامعا راقىمشىلىق جاسايمىز، ولارعا تيىسپەيمىز. جەر بايلىعىن ەلدى قايتا قۇرۋ ءۇشىن پايدالانامىز. قارۋ- جاراق جانە ەسىرتكى ساۋداسىنا بايلانىستى كەز كەلگەن زاڭسىز ارەكەتكە قارسى تۇرامىز. قىز- كەلىنشەكتەر دە بۇرىنعىشا جۇمىس ىستەيدى. ولاردىڭ قۇقىعى ەش شەكتەلمەيدى.
رەيتەر اگەنتتىگىنە سۇحبات بەرگەن جەرگىلىكتى ستۋدەنت، كوشەدە بىردە ءبىر قىز- كەلىنشەكتىڭ كورىنبەيتىنىن العا تارتادى. تاليبان 1996 جانە 2001 -جىلدار ارالىعىندا بيلىك قۇرعاندا، ايەلدەردى جۇمىس ىستەۋدەن تىيىپ، ءتىپتى جۇرت الدىندا تاس لاقتىرۋمەن جازالاعان بولاتىن. قىزداردىڭ مەكتەپكە بارۋىنا تىيىم سالىنىپ، نازىك جانداردىڭ پارانجا كيۋى مىندەت بولعان.
بليتس:
- قىزدار كوشەگە مۇلدە شىقپايدى، ولار ۇيىندە وتىر. سوڭعى 2 كۇن بويى كابۋلدىڭ كوشەسىنەن بىردە ءبىر قىز كورگەن جوقپىن. ولار تالىپتەردەن قورقادى. ءبىراق بۇل جولعى تاليبان بۇرىنعى تاليبان ەمەس. بۇل جولعى تالىپتەر مەيىرىمدى. ولارمەن بىرگە سۋرەتكە ءتۇسىپ جاتقان ادامداردى كوردىم. دەگەنمەن ءبىز تاليباننان قورقامىز. جاستار قازىرگى جاعدايدى تولىق تۇسىنبەي جاتىر.
www.24.kz
