اۋعانستانعا ۇن ەكسپورتى جالعاسا ما؟
ويتكەنى اۋعان ەلىندەگى ساياسي جاعداي ءبىراز وزگەرىس الىپ كەلەرى انىق، دەپ حابارلايدى «حابار 24».
اۋعانستان تۇتىناتىن ۇننىڭ جارتىسىنان كوبى قازاقستاننان الىنادى. وسىدان بەس جىل بۇرىن اۋعان جەرىنە 1 ميلليون 545 مىڭ توننا ۇن جەتكىزىلدى. بۇل رەكوردتىق كورسەتكىش. نارىقتاعى بايلانىس ۇزىلگەن جوق. تەك وزبەكستاننىڭ ءبىزدىڭ بيدايدى وڭدەپ، اۋعانستانعا شىعارۋى كورسەتكىشتىڭ تۇسۋىنە ىقپال ەتكەن. بۇل تۋرالى قازاقستان استىق وڭدەۋشىلەر وداعىنىڭ پرەزيدەنتى ەۆگەني گان ايتتى.
بىلتىر قازاقستاندىق كاسىپكەرلەر 1 ميلليون 152 مىڭ توننا ۇندى ەكسپورتتادى. بيىلعى بايلانىستىڭ قالاي ءوربيتىنىن ءدوپ باسۋ قيىن. بۇعان دەيىن ۇندى ەكسپورتتاۋعا ۋاقىتشا شەكتەۋ قويىلعاندىقتان، اۋعانستانمەن ۇزاق مەرزىمدى كەلىسىمشارت جاسالماعان. ەندى وداق باسشىسى ساياسي شيەلەنىسكە قاراماستان، ازىق- تۇلىككە سۇرانىس ازايمايتىنىن ايتادى. قازىردىڭ وزىندە اۋعان جەرىندەگى نان قورى تاۋسىلىپ بارادى. ءبىزدىڭ ەلىمىز ونداعى ازىق- تۇلىك قاۋىپسىزدىگىن قامتاماسىز ەتۋگە دايىن. دەگەنمەن ناقتى كىمدەرمەن بايلانىس ورناتۋ قاجەتتىگى تۇسىنىكسىز بولىپ تۇر. وعان قوسا بانكتىك تولەمدەردىڭ قالاي جۇزەگە اساتىنى دا بەيمالىم. كاسىپكەرلەر ۆاگونداردىڭ ەلگە قايتارىلاتىنىنا دا كۇماندانىپ وتىر. ايتسە دە، وتاندىق تاسىمالداۋشىلار كەلىسىمنىڭ بۇزىلۋى تۋرالى شاعىم تۇسىرمەگەن.
ەۆگەني گان، قازاقستان استىق وڭدەۋشىلەر وداعىنىڭ پرەزيدەنتى:
- بۇعان دەيىن ءبىز جۇكتىڭ قاۋىپسىزدىگى تۋرالى ويلانعان جوقپىز. ەندىگى جاعداي باسقا. قازىر اۋعانستانداعى بانكتەر جۇمىسىن باستاي ما، جوق پا ول دا سۇراق بولىپ تۇر. حالىقارالىق قارجى ۇيىمدارىنىڭ ارەكەتىن بولجاۋ قيىن. دەگەنمەن ەلدەگى ازىق- تۇلىك قاۋىپسىزدىگىن قامتاماسىز ەتۋىمىز قاجەت. مەنىڭ ويىمشا، اي سوڭىنا دەيىن كىممەن جانە قالاي جۇمىس ىستەۋ ناقتىلانىپ قالار. وسى ساياسي جاعدايعا قاراماستان، اۋعانستان قازاقستاندىق ۇن مەن استىقتى ساتىپ الاتىنىنا سەنىمدىمىن.
بىلتىر قازاق- اۋعان اراسىنداعى تاۋار اينالىمى 55 پروتسەنتكە ارتىپ، 624 ميلليون دوللارعا جەتتى. 2019 -جىلى بۇل كورسەتكىش 400 ميلليون دوللاردان ءسال اسقان. اسىرەسە، ءبىزدىڭ ەكسپورتتىڭ ۇلەسى باسىم. ول دا 55 پروتسەنتكە ءوسىپ، 622 ميلليون دوللار قۇرادى. قازاقستان اۋعانستانعا 334 ميلليون دوللاردىڭ ۇنىن ساتتى. 117 ميلليون ا ق ش دوللارىنا بيداي ساتىلعان.
ال يمپورت 41 پروتسەنتكە ازايدى. وتكەن جىلى 1,7 ميلليون دوللاردىڭ تاۋارىن الدىق. وعان ءجۇزىم، جۇك ۆاگوندارى، ارنايى ماقساتتاعى اپپاراتۋرا جانە كىلەم تاسىمالىنىڭ ازايۋى سەبەپ. ءبىراق ەلىمىزگە سيترۋس ونىمدەرى، راپس مايى، ەرلەر كيىمى مەن قۇرىلىس جابدىقتارى ءالى دە جەتكىزىلەدى.
www.24.kz
