ماجارستاندا ەڭ ۇلكەن «ەدىل قاعان» كيىز ءۇيى تىگىلدى
2011 -جىلدان بەرى وتكىزىلىپ كەلە جاتقان شاراعا ماجارستان، موڭعوليا، تۇركيا، ازەربايجان، ۋكراينا، اۋستريا، گەرمانيا، سەربيادا تۇرىپ جاتقان تۇركى حالىقتارى قاتىستى.
«بابالار كۇنى» ەرتە تۇركى- عۇن مادەنيەتى مەن ءداستۇرىن جاڭعىرتۋعا باعىتتالعان. شاراعا سونداي- اق قازاقستاننىڭ ماجارستانداعى ەلشىلىگىنىڭ وكىلدەرى قاتىستى. قازاقستان ەلشىلىگىنىڭ ءبىرىنشى حاتشىسى ەدىل مىرزاحانوۆتىڭ ايتۋىنشا، ءجۇز مىڭنان استام ادامنىڭ باسىن قوساتىن «بابالار كۇنى» - ەكى ەل اراسىنداعى مادەني، عىلىمي ىنتىماقتاستىقتى دامىتۋعا، باۋىرلاس حالىقتاردىڭ بىرلىگىن نىعايتۋعا ىقپال ەتەدى.
13-15 تامىز ارالىعىندا وتكەن شارادا الەمنىڭ ەڭ ۇزدىك ساداقشىلارى ونەرى كورسەتىپ، يت جۇگىرتىپ، قۇس سالۋ سىندى ساياتشىلىق ءداستۇر دارىپتەلدى. سونداي- اق عۇن مەن اۆار مۇراسىن ۇسىناتىن ماجار عالىمدارىنىڭ ارحەولوگيالىق، انتروپولوگيالىق ەڭبەكتەرى قويىلعان كورمە - الەمدەگى ەڭ ۇلكەن كيىز ءۇي «ەدىل قاعان» شاتىرىندا ورناتىلدى. باعدارلاما اياسىنداعى ءداستۇرلى مۋزىكا كەشىندە تانىمال ونەر شەبەرلەرىنىڭ ورىنداۋىنداعى تۇركى حالىقتارىنىڭ اۋەدەرى شىرقالدى.
كوپشىلىكتىڭ كوڭىلىنەن شىققانى - باقسىلاردىڭ ءان- جىرى، شاڭقوبىزعا ارنالعان كومپوزيتسيالار، كومەيمەن ءان ايتۋ ەپيكالىق جانە اسپاپتىق شىعارمالار. سونداي- اق قولونەر جارمەڭكەسىنە جينالعان شەبەرلەر توقىما ماتادان، كيىزدەن جاسالعان بۇيىمدارىن، التىن- كۇمىس اشەكەيلەرىن، بىرەگەي سۋۆەنيرلەر، ىدىس- اياق، مۋزىكالىق اسپاپ، قارۋ - جاراق تۇرلەرىن ۇسىندى.
شارا بارىسىندا وتباسىلارعا، بالالارعا ارنايى كيىز ءۇي تىگىلىپ، وندا جاسوسپىرىمدەردىڭ شىعارماشىلىق الەۋەتىن دامىتۋعا، قولونەرگە باۋلۋعا ارنالعان شارالار ۇيىمداستىرىلدى. اۋدارىسپاق، كوكپار تارتۋ، ساداق اتۋ جارىستارى، قىلىشتاسۋ، كوشپەندىلەر قالاشىعى، اسكەري پاراد، ۇلتتىق كيىم كورسەتىلىمدەرى مەرەكەسىنىڭ كوركىن قىزدىردى.
اتاپ وتەيىك، «بابالار كۇنى» - ءداستۇرلى فەستيۆال عانا ەمەس، سونىمەن قاتار تۇركى حالىقتارىنىڭ ءوز تاريحىن تۇگەندەپ، انا ءتىلى مەن ءتول مادەنيەتىنەن قول ۇزبەۋگە، وتباسىلىق قۇندىلىقتى ساقتاۋعا، وتانسۇيگىشتىككە تاربيەلەيتىن مەرەكە.
«ماجار- تۇران» قورىنىڭ پرەزيدەنتى، انتروپولوگ اندراش بيرونىڭ ايتۋىنشا، «بابالار كۇنى» شاراسى - كارپات قويناۋىنداعى ماجارلاردىڭ ىنتىماقتاستىعىنىڭ كورسەتكىشى عانا ەمەس، كوشپەلى عۇندار مەن تۇركى تەكتى جۇرتتاردىڭ بۇگىنگى مۇراگەرلەرىنىڭ ورتاق مەرەكەسىنە اينالدى.
«اۋەلگى ماقساتىمىز - جوعارى دەڭگەيدەگى، كەشەندى ءىس- شارانى دۇنيەگە اكەلۋ، سول ارقىلى بابالارىمىزعا قۇرمەت كورسەتىپ، ولاردىڭ مۇراعا قالعان ۇلگى- ونەگەنى دارىپتەۋ بولاتىن. سول ماقسات بۇگىندە ورىندالىپ كەلەدى»، - دەيدى اندراش بيرو.
ەسكە سالا كەتسەك، شىلدەدە ماجارستاندا كوشپەندى حالىقتاردىڭ ۇلتتىق سپورت تۇرلەرىنەن حالىقارالىق سايىس وتكەن بولاتىن.
