الاكولگە باتىپ، كوپ سۋ جۇتىپ قويعان ادامدى ءتىس دارىگەرى مەن سپورتشى امان الىپ قالدى
ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، اسەم ومىربەكوۆا مەن ايدوس سەرىكقالي ۇلى سۋعا تۇنشىققان ادامعا جەدەل جاردەم قىزمەتكەرلەرى كەلىپ جەتكەنشە العاشقى مەديتسينالىق كومەك كورسەتكەن.
«ەكەۋى دوستارىمەن بىرگە الاكولگە دەمالۋعا بارعان. كەنەت ولار سۋ جاعاسىندا جاتقان بىرەۋدىڭ قاسىندا كوپ ادامنىڭ جينالىپ قالعانىن بايقايدى. اسەم مەن ايدوس سول جاققا قاراي جۇگىرە جونەلدى. بەلگىلى بولعانداي، جاڭا باتىپ كەتە جازداعان ادام سۋعا تۇنشىعىپ قالعان. ايدوس ونىڭ كەۋدە تۇسىنا ماسساج جاساپ، جاساندى تىنىس الدىرۋ ارقىلى ءومىرىن ساقتاپ قالۋعا تىرىستى. اسەم دە قاراپ قالماي وعان كومەك كورسەتتى. وسىنىڭ ارقاسىندا ەسىن جيعان ەر ادام جەدەل جاردەم دارىگەرلەرىنە تاپسىرىلعان»، - دەلىنگەن اقپاراتتا.
ايتا كەتەيىك، ايدوس سەرىكقالي ۇلى سەمەيدەگى دجيۋ- دجيتسۋ مەكتەبىن اشقان الەم چەمپيونى. ال اسەم ومىربەكوۆا ءتىس دارىگەرى بولىپ جۇمىس ىستەيدى.
