گرۋزيادا كوروناۆيرۋستان ءار ساعات سايىن ەكى ادام كوز جۇمادى
تولىق ۆاكسينالانعاندار ۇلەسى %10 كە دە جەتپەيدى. ەلدەگى ەپيداحۋال كۇردەلى: كۇن سايىن بەس مىڭنان اسا ناۋقاس انىقتالىپ جاتىر.
قازىر گرۋزيا كوروناۆيرۋستىڭ تارالۋى بويىنشا الەمدە ءبىرىنشى ورىندا، ال ءولىم- ءجىتىم كورسەتكىشى بويىنشا ءتورتىنشى. ءار ساعات سايىن ەلدە بۇل دەرتتەن ورتاشا ەسەپپەن ەكى ادام كوز جۇمادى. ۇكىمەت سانيتارلىق شەكتەۋلەردى قايتا ەنگىزدى.
تبيليسي ورتالىعىنداعى تەحنيكالىق ۋنيۆەرسيتەتتە ۆاكتسينالاۋ ورتالىعى اشىلدى. مۇندا كەز كەلگەن ادام كەزەككە تۇرىپ، ەكپە سالدىرا الادى. بۇرىن دەنساۋلىق ساقتاۋ مينيسترلىگىنىڭ سايتىندا جازىلىپ قانا ۆاكتسينا الۋعا بولاتىن. الايدا بۇل بارىنە قولايلى ەمەس ەكەنى انىقتالدى. ەندى وسىنداي ورتالىقتار بۇكىل ەل اۋماعىندا اشىلادى. جالپى ەلدە ۆاكتسينالاۋ قارقىنى ۇدەي ءتۇستى، كۇن سايىن 30 مىڭداي ادام ەكپە قابىلدايدى.
ۆاجا رازمادزە، تبيليسي قالاسىنىڭ تۇرعىنى:
- كەيدە ينتەرنەتتە جازىلىپ كەزەك الۋ ىڭعايسىز، بەلگىلەگەن كۇنىن ۇزاق كۇتەسىڭ. ال مۇندا بوس ۋاقىتىڭدا كەلىپ، ەكپە سالدىرۋعا بولادى.
گيگا ادەيشۆيلي، تبيليسي قالاسىنىڭ تۇرعىنى:
- ءبىز جازىلدىق، ءبىراق وكىنىشكە قاراي ءالى دە ءبىر اپتا كۇتۋ كەرەك. سوندىقتان كەزەكتە تۇرىپ، ۆاكسينا الۋدى شەشتىك. ءبىر اپتا كۇتكەنشە بۇگىن ەكپە سالدىرعان جاقسى. تەلەديداردان كۇن سايىن اۋرۋ جۇقتىرعان ادامداردى ەستىپ، زارەمىز ۇشتى.
قازىر حالىقتىڭ %6,5 ءى عانا ۆاكسينانىڭ تولىق كومپونەنتىن العان. %20 ىنەن استامى ءبىر عانا ەكپە سالدىرعان. گرۋزيادا جاپپاي ۆاكسينالاۋ شىلدەنىڭ بەسىندە باستالدى. الايدا باسىندا ۆاكسينا دەر كەزىندە جەتكىزىلگەن جوق، سودان كەيىن ەكپە الۋعا بىردەن كوپ ادام جازىلا باستاعاندىقتان، دەنساۋلىق ساقتاۋ مينيسترلىگىنىڭ سايتى ىستەن شىقتى.
قىزىل ايماققا» ەنگەن گرۋزيا كوروناۆيرۋستىڭ تارالۋى بويىنشا الەمدە ءبىرىنشى ورىندا تۇر. اۋرۋحانالار ناۋقاسقا تولىپ، تبيليسيدە دالا گوسپيتالى اشىلا باستادى.
ەكاتەرينا تيكارادزە، گرۋزيا دەنساۋلىق ساقتاۋ ءمينيسترى:
- دالا گوسپيتالى 500 ناۋقاس قابىلداي الادى. توسەك- ورىندارىنىڭ كوبىسى وتتەگىمەن جابدىقتالادى. وتتەگىمەن قامتاماسىز ەتەتىن 5 توننالىق ەكى تسيستەرنا ورناتىلعان.
ەپيدەميولوگتاردىڭ بولجاۋىنشا، ناۋقاستار سانى ءالى دە وسەدى. ۇكىمەت قايتا شەكتەۋلەردى ەنگىزۋگە ءماجبۇر بولدى. 14-تامىزدان 4-قىركۇيەككە دەيىن قوعامدىق كولىك قاتىنامايدى، كافە جانە مەيرامحانالار ساعات كەشكى 23:00 گە دەيىن جۇمىس ىستەيدى. فەستيۆال، كونتسەرت پەن سپورتتىق شارالار وتكىزۋگە تىيىم سالىنىپ، مەملەكەتتىك قىزمەتكەرلەر قاشىقتان جۇمىس ىستەيتىن بولدى.
اۆتورى: يۋليا تۋجيلكينا
www.24.kz
