توكيو وليمپياداسىنىڭ جۇلدەگەرلەرى زۋلفيا چينشانلو مەن يگور سون باسپانالى بولدى
اۋىر اتلەتتەرگە ەكى جانە ءۇش بولمەلى پاتەر سەرتيفيكاتتارىن ءوڭىر باسشىسى اماندىق باتالوۆ سالتاناتتى تۇردە تابىستادى. سونداي- اق سپورتشىلاردى باپتاعان جاتتىقتىرۋشى سەرگەي سەدوۆقا 2 ميلليون تەڭگە سىياقى بەرىلدى.
كۇنشىعىس ەلىندە قازاقستاننىڭ كوك بايراعىن جەلبىرەتكەن قوس سپورتشىنىڭ جەتىستىكتەرى جەتىسۋ حالقىنىڭ دا ابىرويىن اسقاقتاتقانىن اتاپ وتكەن وبلىس اكىمى اتلەتتەردىڭ ءوز شەبەرلىگىن شىڭداۋعا بارلىق جاعداي جاساۋعا ۋادە بەردى. سپورتشىلار ءوز كەزەگىندە بۇل ناتيجەمەن توقتاپ قالماي ءالى دە ەڭبەكتەنىپ، پاريج وليمپياداسىندا ونەر كورسەتۋگە كۇش سالاتىنىن جەتكىزدى.
ايتا كەتۋ كەرەك توكيو وليمپياداسىنا الماتى وبلىسىنان 10 سپورتشى قاتىسقان بولاتىن. «ءبىر جىلدان كەيىن ازيا ويىندارى وتەدى. ازداعان جاراقاتتارىم بار. سولاردى ەمدەپ الىپ، وسى قۇرلىق دوداسىنا دايىندالام. ودان كەيىن پاريج وليمپياداسى. ءبارى ويداعىداي بولسا سول جارىستان «التىن» الامىن دەگەن وزىمە ۇلكەن ماقسات قويىپ وتىرمىن»، - دەدى توكيو وليمپياداسىنىڭ قولا جۇلدەگەرى يگور سون.
اۆتور: سامال قابىشيەۆا
